قىزىلوردالىق تۇلەكتەرگە رەسەيدە ءبىلىم الۋعا بەرىلەتىن گرانت سانى 300 گە دەيىن كوبەيەدى

قىزىلوردا. قازاقپارات - قىزىلوردا وبلىسىنىڭ باسشىسى قىرىمبەك كوشەربايەۆتىڭ توراعالىعىمەن وبلىس اكىمى اپپاراتىنىڭ ءماجىلىسى ءوتتى. كۇن تارتىبىندە 7 ماسەلە قارالىپ، ولاردىڭ ءارقايسىسىنا جان-جاقتى تالداۋ جاسالدى.

بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

مەكتەپ بىتىرۋشىلەردىڭ ءبىلىم ساپاسىن انىقتايتىن ەڭ باستى ولشەمگە اينالعان ۇلتتىق ءبىرىڭعاي تەستىلەۋگە 2 ايداي ۋاقىت قالدى. وبلىستىق ءبىلىم باسقارماسىنىڭ باسشىسى باقىتجان سايلىبايەۆتىڭ ايتۋىنشا، وقۋ جىلىنىڭ باسىنان بەرى وتكىزىلگەن سىناما تەستتەردىڭ قورىتىندىسى اي سايىن تالدانادى. قازىرگى ۋاقىتتا سىناما تەستكە مەكتەپ بىتىرۋشىلەردىڭ 69,1 پايىزى قاتىسۋدا.

الدىن الا سىناقتى تەگىن وتكىزۋ ءۇشىن كىتاپشا الىپ بەرۋ، مەكتەپ بىتىرۋشىلەردى وبلىستىق وليمپيادالار جانە قوسىمشا ءبىلىم بەرۋ ورتالىعىندا دايىندىق كۋرستارىنان وتكىزۋ قارقىندى جۇرگىزىلۋدە.

ناۋرىز ايىنداعى ورتاشا بالدىق كورسەتكىش 76,4 بولدى. ناتيجە قىركۇيەكتەگى 61,3 بالدىق كورسەتكىشتەن ەداۋىر كوتەرىلگەنىمەن، وسى كەزەڭدە ورتاشا بالل 70-80 گە دەيىن جەتۋى ءتيىس ەدى.

«التىن بەلگىدەن» ۇمىتكەرلەردىڭ 40,8 پايىزى، «ۇزدىك اتتەستاتتان» ۇمىتكەرلەردىڭ 29,8 پايىزى عانا ازىرگە ءوز بىلىمدەرىن دالەلدەپ وتىر. مالىمەتتەرگە قاراعاندا، ماتەماتيكا، ورىس ءتىلى پاندەرى بويىنشا بالل كورسەتكىشى كوتەرىلمەي كەلەدى. بۇل وسى پاندەر مۇعالىمدەرىنە ەرەكشە تالاپ قوياتىن ۋاقىت جەتكەنىن اڭعارتادى.

بىلتىر رەسەيدىڭ جوعارى وقۋ ورىندارىنا 107 تۇلەك وقۋعا تۇسكەن بولاتىن. بيىل گرانت سانى 300 گە دەيىن كوبەيمەك.

رەسەي ج و و- لارىندا وقيتىن بالالار فەدەرالدىق بيۋجەت ەسەبىنەن ءبىلىم الىپ جاتقانىن ەسكەرسەك، سىربويىلىق ورەندەرگە قولداۋ كورسەتۋ ارقىلى قاجەتتى ماماندار ازىرلەۋ جۇيەلى تۇردە جۇزەگە اسۋدا.

بۇگىندە رەسەيدىڭ باسقا دا ج و و- لارىمەن كەلىسسوزدەر جۇرگىزىلۋدە. «سەرپىن-2050» باعدارلاماسى دا ءبىلىم الامىن دەگەن جاستاردىڭ تالابىن ۇشتاۋعا قىزمەت ەتەدى.

بۇگىندە سىر وڭىرىندەگى 22 مەكتەپتى نازاربايەۆ زياتكەرلىك مەكتەبى دەڭگەيىنە كوتەرۋ ءۇشىن جۇمىستار جاسالۋدا. الداعى جىلدارى وسى ماقساتقا 9 ميلليارد تەڭگە قارجى بولىنبەك. تالاپتى بالالارعا قولداۋ كورسەتۋ ودان ءارى جالعاسادى. جاس ۇرپاقتىڭ ءبىلىم الۋى ءۇشىن سالىنعان ينۆەستيتسيا ەسەلەپ قايتاتىنى ءسوزسىز. الداعى ۋاقىتتا ورتاشا بالدى ەڭ كەمىندە 80 گە جەتكىزۋ ءۇشىن كۇش سالۋ كەرەك.

ءبىلىم باسقارماسىنىڭ باسشىسى وقۋشىلاردىڭ جازعى دەمالىسىن ۇيىمداستىرۋدىڭ كەيبىر ماسەلەلەرىنە، لاگەرلەردىڭ دەمالىس ماۋسىمىنا ازىرلىگىنە توقتالدى. جاز بويى قالا سىرتىنداعى، كۇندىزگى لاگەرلەرمەن، دەمالىستىڭ باسقا دا تۇرلەرىمەن وقۋشىلاردىڭ شامامەن 93 پايىزىن قامتۋ جوسپارلانعان. وقۋ-ساۋىقتىرۋ ورتالىقتارىنىڭ جىل بويى جۇمىس ىستەۋىن جولعا قويۋ ۋاقىت تالابىنا اينالىپ وتىر، - دەيدى ول.

ءماجىلىس قورىتىندىسىندا كۇن تارتىبىندەگى ماسەلەلەرگە وراي شەشىمدەر قابىلداندى.

اۆتور: ەلۋباي اۋەزوۆ