قازاقستان جەرىنەن 300 مەترلىك «ادام باسسۇيەگى» تابىلدى - كەسكىن

استانا. قازاقپارات - قازاقستاننىڭ تابيعاتى عاجايىپتارىمەن تاڭعالدىرۋىن قويار ەمەس.

تاۋ جىنىستارىنان قۇراستىرىلعان ادامنىڭ باسسۇيەگى ومىردە تىلسىم كۇشتىڭ بارىنا سەنبەسكە شارا بەرمەيدى.

تاۋ جىنىستارىنان قۇراستىرىلعان ادامنىڭ بەتى اڭعارىلاتىن عارىشتان تۇسىرىلگەن بىرەگەي كادرلار ەنگەن «سپۋتنيكتەن تۇسىرىلگەن قازاقستاننىڭ تىلسىم سۋرەتتەرى» اتتى ۆيدەو عالامتوردا 600 مىڭنان اسا كورىلىپتى.

وسى تاۋلارعا اڭسارى اۋعان استانالىق ەدىگە سابادوللايەۆ سول جاققا ساياحات جاساۋعا بەل بۋادى. بۇل جازىق دالا اقتوبە مەن قوستاناي وبلىستارىنىڭ شەكاراسىندا ورنالاسقان. ەڭ جاقىن ەلدى مەكەن وسى جەردەن 200 شاقىرىمداي جەردە كورىنەدى. «تاۋ جىنىستارى ادامنىڭ بەت ءجۇزىن قۇراستىرىپتى: سپۋتنيكتەن تۇسىرىلگەن سۋرەتتەردەن قوس قاباق، مۇرىن، كوز بەن بەت ءپىشىنىن انىق اڭعارۋعا بولادى، - دەيدى ەلوردالىق ساياحاتشى.

-  مۇنىڭ ءبارىن جاقىننان كورگەن اسىرەسە كەرەمەت». بۇل قىرقا تاقىر دالادا ورنالاسقان ەكەن. جازىق جەردە جۇيە قۇرعان جۇمباق بەينەنىڭ قاسيەتى جايىندا ەدىگە جەرگىلىكتى شوپانداردان سۇراپ- بىلەدى. ولاردىڭ ءبارى قازاقستاندىق «سفينكس» جايىندا تەك جاعىمسىز پىكىرلەر ايتىپتى. وعان اياق باسقان مال سەبەپسىز قىرىلىپ قالادى دەسەدى.

«وسى جەرگە كەلگەنىمدە ءوزىمدى جايسىز سەزىندىم، - دەپ اڭگىمەلەيدى ساياحاتشى. -  سوڭىمنان بىرەۋ باقىلاپ تۇرعانداي كورىندى. جولسەرىك بولىپ ەرىپ كەلگەن دوسىمىز ەكەۋىمىز بۇل جەردەن تەزىرەك كەتكىمىز كەلدى. ەڭ قورقىنىشتىسى كولىگىمىز وتالماي قالدى. دۇعا-تىلەكتەرىمىزدى ايتىپ، ءتىلىمىزدى كاليماعا كەلتىرگەندە عانا تەمىر تۇلپار ورنىنان قوزعالدى. ساپار باسىندا وسى جەرگە ءبىر تۇنەسەم بە دەگەن وي بولعان. ءبىراق ءبىرتۇرلى قورقىنىش سەزىمى بويىمىزدان قايتپاي، امانىمىزدا تەزىرەك كەتەيىك دەپ شەشتىك».

ەرەكشە تابيعي قۇبىلىستى تەرەڭنەن زەرتتەۋگە تىرىسقان ەدىگە قازاقستاندىق «سفينكستىڭ» الەمدە بالاماسى جوق ەكەنىن انىقتاپتى. ءبىراق مۇنداي «ادام كەلبەتى» مارستا ۇشىراسادى ەكەن. ونىڭ كولەمى وتانىمىزداعى «وبرازدان» الدەقايدا ۇلكەن.

تابيعي ءمۇسىننىڭ ديامەترى 300 مەتر شاماسىندا بولسا، مارستىق بالاماسى 1,5 شاقىرىمنان اسادى. «بۇل جەل مەن جاڭبىر سىندى سۋرەتشىلەردىڭ قولىنان تۋىنداعان تابيعي سكۋلپتۋرا ءتارىزدى. بالكىم بۇل قاندايدا ءبىر ەسكەرتۋ رەتىندە بىزگە بەيتانىس وركەنيەتتەن قالعان قۇپيا بەلگى شىعار»، - دەگەن ويىمەن بولىسەدى ەدىگە. 

24.kz