ەر جانىبەك - 300 جىل. استانادا وتەتەتىن شارالار

 استانا. قازاقپارات - ولاردىڭ ەسىمىن كوتەرۋ، ونى كەلەر ۇرپاققا اماناتتاۋ - تاۋەلسىزدىك تۇعىرىمىزدى ودان ارى بەكەمدەۋ.

قازاق دالاسى ءۇشىن جان اياماي كۇرەسكەن باتىر بابالارىمىزدىڭ ەڭبەگىن باعالاۋ، اس بەرۋ، ءباھادۇر ەرلەرىمىزدىڭ تاريحي ءرولىن عىلىمي-ءبىلىمي تۇرعىدان ناسيحاتتاۋ ءىس شارالارى قازاقستاننىڭ تاۋەلسىز كەزەڭىندە ەركىن جولعا قويىلدى.

وسىنداي ەل رۋحىنىڭ مەرەيلى شاعىندا - بيىلعى 2014 - جىلى، قازاق جەرىن شاپقىنشىلاردان ازات ەتۋدە ەرەن ەرلىك كورسەتكەن ايگىلى قازاق باتىرى جانىبەك بەرداۋلەت ۇلىنىڭ (1714-1792 ج ج. ) تۋعانىنا 300 جىل تولىپ وتىر.

جانىبەك سىندى باتىرلار ەڭبەگىن باعالاۋ - جاس ۇرپاقتى وتان سۇيگىشتىك رۋحقا تاربيەلەيتىن باعالى وقۋلىق ىسپەتتى. ولاردىڭ ەسىمىن كوتەرۋ، ونى كەلەر ۇرپاققا اماناتتاۋ -  تاۋەلسىزدىك تۇعىرىمىزدى ودان ارى بەكەمدەپ، «ماڭگىلىك ەل» مۇراتىنا جەتۋىمىزگە ايقىن باعدار، جالىندى رۋح سىيلايدى.

وسى ورايدا، رەسپۋبليكامىزدىڭ جەر-جەرىندە اتالىپ جاتقان مەرەيتوي اياسىندا استانا قالاسىندا دا ارنايى ءىس-شارالار ۇيىمداستىرىلۋدا. ناقتىلى كۇن ءتارتىبى تومەندەگىدەي:

17 - ماۋسىم. 17:00 ساعاتتا - استانا قالاسى بەيبىتشىلىك جانە كەلىسىم سارايىندا ەر جانىبەك رۋحىنا ارنالعان اقىندار ايتىسى.

19 - ماۋسىم. 9:30 ساعاتتا - ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ەر جانىبەكتىڭ 300  جىلدىق مەرەيتويىنا ارنالعان «ماڭگىلىك ەل جانە ەر جانىبەك» اتتى حالىقارالىق عىلىمي-پراكتيكالىق كونفەرەنسيا.

13:00 ساعاتتا - اقمولا وبلىسى، سەلينوگراد اۋدانى، قوياندى اۋىلىندا باتىردىڭ 300 جىلدىق مەرەيتويىنا ارنالعان ارنايى اس.

14:30 ساعاتتا - ەر جانىبەك اتىنداعى جاستار مەن جاسوسپىرىمدەر اراسىندا «بەلبەۋ كۇرەسىنەن» رەسپۋبليكالىق بىرىنشىلىك (چەمپيونات) پەن قازاق كۇرەسىنەن وتەتىن تۇيە پالۋان جۇلدەسىنىڭ باستالۋى.

- 15:30 ساعاتتا - قوياندى اۋىلى ورتالىعىنداعى «ەر جانىبەك باقشاسىنا» قويىلاتىن باتىردىڭ اتقا مىنگەن تۇلعاسى ورنايتىن ەسكەرتكىشتىڭ ىرگە تاسىن قالاۋ ءراسىمى.

- قوياندى اۋىلىنىڭ ورتالىعىنان الىنعان «ەر جانىبەك كوشەسىنىڭ» تۇساۋكەسەر سالتاناتى. باتىر رۋحىنا ارنالعان ادەبي-مۋزىكالىق كەش.

- 19:00 دە جالپى قورىتىندى.

سالتاناتتى شاراعا ق ر پارلامەنت ءماجىلىسى دەپۋتاتتارى، اقمولا وبلىسى اكىمدىگى، ق ر دەنە شىنىقتىرۋ جانە سپورت اگەنتتىگىنىڭ باسشىلارى مەن الەم چەمپيوندارى، اقىن-جازۋشى، عالىمدار، سەلينوگراد اۋدانى اكىمى، شەتەلدەن كەلگەن سىيلى قوناقتار قاتىسادى دەپ كۇتىلۋدە.

«ەر جانىبەك حالىقارالىق قوعامدىق قورى» ۇيىمداستىرۋ كوميسسياسى

استانا قالاسىنداعى بايلانىس تەل: 87017499842 , 87016189990

kazaitys.kz