ەلوردادا 3000 نان استام ادام ەكسكۋرسيالىق اۆتوبۋسپەن جۇرگەن

استانا. قازاقپارات - ەلوردا تۇرعىندارى مەن قوناقتارى قالانى ەكى قاباتتى اۆتوبۋسپەن ارالاپ، كورىكتى جەرلەردى تاماشالايدى.
None
None

ەكسكۋرسيالىق اۆتوبۋستار 27 -ماۋسىمدا جۇرە باستادى. وسى كۇنگە دەيىن ونىمەن ءۇش مىڭنان استام ادام جۇرگەن. سول جاعالاۋداعى باستى كورىكتى ورىنداردىڭ قالىپتاسۋ تاريحىمەن اۋديوگيد جۇيەسى ارقىلى تانىسۋعا بولادى. بۇل تۋرالى ەلوردا اكىمىنىڭ رەسمي سايتى حابارلادى.

قازىرگى كەزدە قالا بويىنشا ءۇش اۆتوبۋس قاتىنايدى. ولار «دۋمان» ويىن- ساۋىق ورتالىعىنان شىعىپ، «حان شاتىر» ساۋدا، ويىن- ساۋىق ورتالىعىنا، ق ر ۇلتتىق مۋزەيىنە جانە «بايتەرەك» مونۋمەنتىنە بارادى، سودان كەيىن باستاپقى نۇكتەگە ورالادى.

مارشرۋتتىڭ جالپى ۇزىندىعى - 17 ك م جۋىق، ساپار ورتا ەسەپپەن 1 ساعات 20 مينۋتقا سوزىلادى. الداعى ۋاقىتتا اۆتوبۋس باعدارىن ەكسپو حالىقارالىق كورمەسىنىڭ نىساندارىنا دەيىن جەتكىزۋ جوسپارلانىپ وتىر.

- تۋريستەر جاس استانانىڭ قالىپتاسۋ تاريحىنا قىزىعۋشىلىق تانىتادى، ءبىز ولارعا سالىنىپ جاتقان ەلوردامىزدى باسقا قىرىنان تاماشالاۋدى ۇسىنامىز. بيلەتتىڭ ەرەكشەلىگى - ونىڭ 24 ساعاتقا جارامدى بولاتىندىعىندا. وعان كاسسالىق اپپاراتپەن ۋاقىت جازىلادى: جۇمىس كۇندەرى ساعات وننان كەشكى 8 گە دەيىن، جۇما جانە سەنبى كۇندەرى كەشكى 11 گە دەيىن جۇرۋگە بولادى، دەمالىسسىز، - دەيدى «Visit Astana» ج ش س ەكى قاباتتى اۆتوبۋستارمەن ەكسكۋرسيالىق تۋر جوباسىنىڭ اكىمشىسى لاريسا ۆوستروۆا.

وسىنداي بيلەتپەن اۆتوبۋستان ءتۇسىپ، قالانىڭ كورىكتى ورىندارىمەن ەتەنە تانىسىپ، ارنايى ايالداما كەشەندەرىندە وعان قايتا وتىرۋعا بولادى.

ەكسكۋرسيا كەزىندە قوناقتارمەن بىرگە گيدتەر دە جۇرەدى، بيلەتتەردى «دۋمان» و و مەن «بايتەرەك» مونۋمەنتىنىڭ جانىنان نەمەسە گيدتەردەن ساتىپ الۋعا بولادى. كۇنىنە ورتا ەسەپپەن 180 جۋىق ادام ەكسكۋرسيالىق اۆتوبۋسپەن جۇرەتىنىن ايتا كەتكەنىمىز ءجون.

- مەن اۆستراليادان مەلبۋرننان كەلدىم. ماعان استانا ۇنايدى. قالانىڭ ساۋلەتى تاڭعالارلىق، وتە قىزىق. اۆتوبۋستار دا جاقسى، ونىمەن بۇكىل قالانى ارالاۋعا بولادى، - دەيدى ەلوردا قوناعى مەلودي.

اۆتوبۋستاردا وتە ىڭعايلى اۋديوگيد جۇيەسى ورناتىلعان. جولاۋشىلار قۇلاققاپتاردىڭ كومەگىمەن قازاق، ورىس، اعىلشىن جانە قىتاي تىلدەرىندە اڭگىمەلەر تىڭداي الادى. ەكسپو-2017 حالىقارالىق مامانداندىرىلعان كورمەسىنە دەيىن جۇيەگە تۇرىك، نەمىس، فرانسۋز، يسپان تىلدەرىن قوسۋ جوسپارلانعان.

- قوناقتاردىڭ كوبى استانا بۇرىن قانداي بولعان دەپ سۇرايدى، سوندىقتان استانانىڭ قالىپتاسۋى تۋرالى سۋرەتتەر دايىنداپ جاتىرمىز. ولاردى اۆتوبۋستىڭ ءبىرىنشى قاباتىنىڭ سالونىنا ىلەمىز، - دەيدى لاريسا ۆوستروۆا.

ايتا كەتەيىك، جولاۋشىلارعا قولايلى جاعداي جاساۋ ماقساتىندا جاقىن ارادا اۆتوبۋستار كەشكى قالانى تاماشالاۋعا ارنالعان اشىق قىزىل جانە سارى ءتۇستى فيرمالىق ورامالدارمەن تولىعا تۇسپەك.

سوڭعى جاڭالىقتار