قازاقستاندا 300 مىڭ ءسۇربويداق پەن تۇرمىسقا شىقپاعان 700 مىڭ قىز بار
استانا. قازاقپارات - «ۇلى دالا ەلى - ۇلتتىق رۋحانياتتىڭ مەكەنى». وسىنداي اتاۋمەن الماتىدا جەلتوقسان وقيعاسىنىڭ 30 جىلدىعىنا، تاۋەلسىزدىكتىڭ 25 جانە الماتى قالاسىنىڭ 1000 جىلدىعىنا ورايلاستىرىلعان جيىن ءوتتى، - دەپ حابارلايدى «الماتى» تەلەارناسى.
رۋحاني كەشتىڭ باستى تاقىرىبى ۇلى دالا ەلى بولدى. جينالعان قاۋىم قازاق ەلىندە بەلەڭ الىپ جاتقان جاعدايلاردى جىپكە ءتىزدى. ستاتيستيكا بويىنشا، قازاقستاندا 18 بەن 35 جاس ارالىعىنداعى كۇيەۋگە شىقپاعان 700 مىڭ قىز بەن 300 مىڭ ءسۇربويداق بار ەكەن.
ال، شەتەلدىك ەركەكتەردىڭ ەتەگىنەن ۇستاپ كەتەتىندەردىڭ كورسەتكىشى 10 پايىزعا جەتكەن. ساراپشىلار «قوعام ازعىنداپ، كەرى كەتىپ بارادى» دەيدى. بۇگىنگى ۇلى دالا ەلى جيىنىنا جينالعاندار قوعامدى ىشتەن ىرىتكەن ماسەلەلەردى تالداپ، قازاق ەلىنىڭ رۋحاني قۇندىلىعىن ساقتاپ قالۋ جولىندا جۇمىس جاساۋ كەرەكتىگىن ايتتى.
«ۇلى دالا قىراندارى» قوزعالىسىنىڭ تەڭ ءتوراعاسى سادىبەك تۇگەل رۋحاني ازعىندىقتاردان ادا بولۋىمىز كەرەكتىگى جايلى ايتادى. «رۋحاني ازعىندىقتار بار عوي، سولاردان ءبىز ادا بولۋىمىز كەرەك. ول قانداي دەسەڭىز، قازاقتىڭ 2 مىڭ جىلدىق تاريحىندا ءتانىن ساتىپ تابىس تابۋ، جەزوكشەلىك دەگەن بولماعان. گەي كلۋبتار دەگەن بولماعان. ماسكۇنەمدەر بولماعان. ناركوماندار بولماعان، مىنەكي»، - دەدى ول.
ۇلى دالانىڭ باستى ماقساتى - سالت-ءداستۇردى قايتا جاڭعىرتۋ. جاس بۋىننىڭ ساناسىن قازاقي عۇرىپتا تاربيەلەۋ. حالىقتىڭ رۋحاني بايلىعىن ارتتىرۋ ءۇشىن الماتى قالاسىنىڭ 1000 جانە جەلتوقسان كوتەرلىسىنىڭ 30 جىلدىعى جانە باسقا دا ماڭىزدى داتالاردى ءجيى دارىپتەۋ كەرەكتىگى ايتىلدى.
