بريۋسسەلدەگى جارىلىس: جارالانعاندار سانى 300 گە جەتتى، ونىڭ 61 ءى اۋىر جاعدايدا

استانا. قازاقپارات - بريۋسسەلدەگى لاڭكەستىك سالدارىنان 31 ادام قازا تاۋىپ، 300 گە جۋىعى جارالانعان. ونىڭ 150 ءى اۋرۋحانادا جاتىر، دەپ حابارلادى «ت ا س س» اگەنتتىگى بەلگيا دەنساۋلىق ساقتاۋ مينيسترلىگىنە سىلتەمە جاساي وتىرىپ.

«سوڭعى مالىمەتتەر بويىنشا، 31 ادام قازا تاۋىپ، 300 ادام جارالانعان، 150 ادام ءالى دە اۋرۋحانادا، سونىڭ ىشىندە 61 ادامنىڭ جاعدايى وتە اۋىر»، دەلىنگەن حابارلامادا.

بۇعان دەيىن ب ا ق- تا 32 ادام قازا تاپتى دەگەن اقپارات تاراعان بولاتىن.

سونىمەن قاتار، سەيسەنبى كۇنى بريۋسسەلدە بولعان جارىلىستا قازا تاپقانداردىڭ ءبىرقاتارىنىڭ اتى-ءجونى انىقتالدى. قازىرگى ۋاقىتتا ەل استاناسىنداعى اسكەري گوسپيتالدە مايىتتەردى تانۋ، انىقتاۋ پروتسەسى ءجۇرىپ جاتىر.