اسكەرگە شاقىرىلاتىن 300 مىڭعا جۋىق ازاماتتىڭ 40 مىڭىنىڭ عانا دەنساۋلىعى جارامدى
![None None](/static/img/plug.webp)
بۇل تۋرالى ق ر پرەمەر-ءمينيسترىنىڭ ورىنباسارى ەرالى توعجانوۆقا جولدانعان سەناتور نۇرجان نۇرسيپاتوۆتىڭ دەپۋتاتتىق ساۋالىندا ايتىلعان، دەپ حابارلايدى قازاقپارات ءتىلشىسى.
«بۇگىنگى دەپۋتاتتىق ساۋالعا ۇرپاق تاربيەسىندە، ءبىزدىڭ پىكىرىمىزشە، ءالى دە ءتيىستى دەڭگەيدە جۇرگىزىلمەي جاتقان، نازارسىز قالىپ قويعان كۇردەلى ماسەلە سەبەپ بولىپ وتىر. ول - بالالارىمىزعا اسكەري- پاتريوتتىق، وتانشىلدىق رۋحتا بەرىلۋگە ءتيىس تاربيە. تاربيە تامىرى ۇلتتىق رۋحاني قۇندىلىقتارمەن، وتانشىل سەزىممەن سۋارىلعان بالا عانا ەرتەڭ مەملەكەتتىڭ قاۋىپسىزدىگىنە، تاۋەلسىزدىگىنە الاڭدايتىن، وتانىنىڭ بولاشىعى ءۇشىن جاۋاپكەرشىلىكتى موينىنا الا بىلەتىن ازامات بولىپ وسەدى. اسكەر قاتارىندا ءبىلىمدى، بىلىكتى سارباز بولادى. قوعام مۇددەسىن بارىنەن بيىك قوياتىن مەملەكەتتىك قىزمەتكەر بولادى. وتاندى قورعاۋ- ءاربىر قازاقستان ازاماتىنىڭ ابزال بورىشى. ول ەڭ الدىمەن، وتانشىلدىقتان، اسكەري- پاتريوتتىق تاربيەدەن باستالادى»، - دەدى سەناتور.
ونىڭ اتاپ وتۋىنشە، الەمدە بولىپ جاتقان ساياسي- ەكونوميكالىق داعدارىس، پاندەميا جاعدايى بۇعان دەيىن توقتاتۋعا مۇمكىن ەمەس بولىپ كورىنگەن جاھاندانۋ ۇدەرىسىنە تەجەۋ بولدى. ءار مەملەكەت بۇگىندە ىشكى ماسەلەلەرىنە، اسىرەسە ءبىلىم، عىلىم، مەديتسينا، مادەنيەت، ۇرپاق تاربيەسىنە، قاۋىپسىزدىك پەن قورعانىس سالاسىنا ەرەكشە ءمان بەرە باستادى.
«وسى ورايدا، ءبىزدىڭ مەملەكەتتىڭ دە اسكەري- پاتريوتتىق تاربيەدە زامان سۇرانىسىنا ساي ءوز كوزقاراسى مەن ءوز پەداگوگيكالىق، سونداي-اق، بولاشاق سارباز تاربيەلەۋدەگى مەتوديكالىق ءتول تاسىلدەرى قالىپتاسۋى كەرەك دەپ ويلايمىز. بۇگىنگى كۇنى جىل سايىنعى اسكەري قىزمەتكە شاقىرىلۋعا جاتاتىن ازاماتتاردىڭ سانى 300 مىڭعا جۋىق بولسا، سونىڭ 40 مىڭىنىڭ عانا دەنساۋلىعى اسكەري بورىشىن وتەۋگە جارامدى. اسكەر قاتارىنا شاقىرۋ قاعازىن العان ازاماتتاردىڭ 25,4 پايىزى اسكەري قىزمەتكە پسيحولوگيالىق جانە مورالدىق تۇرعىدا دايىن ەمەس. اسكەري قىزمەتكە شاقىرىلۋدان جالتارۋ ماسەلەسى ءالى دە كۇن تارتىبىنەن تۇسكەن جوق. ال، ۇكىمەتكە پرەزيدەنت قاسىم-جومارت توقايەۆ قازاقستان اسكەرىنىڭ بەدەلىن كوتەرۋ جونىندە ناقتى تاپسىرما بەرگەن بولاتىن. وسى ورايدا ايتارىمىز: بۇل جۇمىستى ناتيجەلى جۇرگىزۋ ءۇشىن بىرنەشە مەملەكەتتىك ورگان جۇمىلۋ كەرەك. قورعانىس، اقپارات جانە قوعامدىق دامۋ، ءبىلىم ءجان عىلىم، مادەنيەت جانە سپورت مينيسترلىكتەرى كۇش بىرىكتىرۋ قاجەت»، - دەدى ول.
سەناتوردىڭ ايتۋىنشا، ناسيحات جۇمىسى اياسىندا اسكەري- پاتريوتتىق رۋح، مادەنيەت پەن ۇلتتىق تاريحتى، ۇلت باتىرلارىن، ءوز كاسىبىنىڭ شەبەرى بولعان وتاندىق تۇلعالاردى ناسيحاتتايتىن حابارلار، فيلمدەر ءتۇسىرىلىپ، كىتاپتار شىعارىلىپ، ينتەرنەت- كونتەنت جاسالۋى ءتيىس. مۇنداي كونتەنتتىڭ قارالىمى كوپ، تارالىمى كەڭ بولۋى ءۇشىن ونىڭ كورەرمەنگە ۇسىنۋ فورماسى دا ساپاسى دا زامانعا ساي بولۋى كەرەك. «ساۋالىمىزدىڭ ەڭ ماڭىزدى تۇسى: اسكەري- پاتريوتتىق تاربيە ماسەلەسى قولدانىستاعى زاڭنامادا بەكىتىلمەگەندىگى.
«قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى»، سونداي-اق «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭدارىنىڭ ەسكى، 1993 -جىلعى رەداكسيالارىندا تاپسىرما رەتىندە بەكىتىلگەن ەدى. الايدا، زاڭداردىڭ جاڭا رەداكسياسىندا بۇل تاپسىرمالار، زاڭعا تاۋەلدى نورماتيۆتىك قۇقىقتىق اكتىلەردىڭ دەڭگەيىنە تۇسىرىلگەن. وسىعان وراي، اسكەري- پاتريوتتىق تاربيە بەرۋ جۇمىستارىن جۇرگىزۋدى مەملەكەتتىك ورگانداردىڭ باستى تاپسىرمالارىنىڭ ءبىرى رەتىندە زاڭنامالىق تۇرعىدا بەكىتۋ، ولاردىڭ ءوز-ارا جۇمىستارىن ۇيلەستىرۋ جانە ناسيحاتتاۋ جۇمىستارىندا زاماناۋي اقپارات قۇرالدارىن بەلسەندى پايدالانۋ ماسەلەلەرىن قاراستىرۋلارىڭىزدى سۇرايمىن»، - دەدى نۇرجان نۇرسيپاتوۆ.
اۆتور: مارلان جيەمباي