قازاقستاندا 30 مىڭنان استام IT مامان جەتىسپەيدى - اسقار جۇماعاليەۆ

نۇر-سۇلتان. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ۇكىمەت وتىرىسىندا «سيفرلىق قازاقستان» باعدارلاماسىنىڭ ناتيجەسىن بايان ەتتى، دەپ حابارلايدى قازاقپارات ءتىلشىسى.

بۇگىنگى كۇنى ەل تۇرعىندارىنىڭ سيفرلىق داعدىسى - %82,1. وسى جوعارى كورسەتكىشتىڭ ارقاسىندا ەلىمىز سيفرلاندىرۋ بويىنشا جاقسى جەتىستىكتەرگە قول جەتكىزۋدە.

«جالپى العاندا، IT سالاسىنداعى ادامي كاپيتالدىڭ دامۋى ارقاسىندا بۇگىنگى كۇنى «سيفرلىق قازاقستان» باعدارلاماسى اياسىندا 802,5 ميلليارد تەڭگە ەكونوميكالىق تيىمدىلىككە قول جەتكىزىلدى. ءارتۇرلى سالالاردا 120 مىڭنان استام جۇمىس ورنى اشىلدى. وتاندىق ستارتاپتارعا 38 ميلليارد تەڭگەگە جۋىق ينۆەستيتسيا تارتىلدى»، - دەپ اتاپ ءوتتى اسقار جۇماعاليەۆ.

ونىڭ ايتۋىنشا، حالىقارالىق رەيتينگتەردە جاقسى جەتىستىكتەر بار.

«بۇگىنگى كۇنى مەملەكەت باسشىسى قاسىم-جومارت كەمەل ۇلىنىڭ تاپسىرماسىن ورىنداۋ اياسىندا مەملەكەتتىك باعدارلاماعا وزگەرىستەر ەنگىزىلىپ وتىر. ونىڭ ىشىندە بيزنەستى، ەكونوميكا سالالارىن سيفرلاندىرۋعا باسا كوڭىل بولىنەدى. ناقتىراق ايتقاندا ەكونوميكانى تسيفرلاندىرۋدىڭ باستى درايۆەرلەرى رەتىندە 10 تەحنولوگيالىق پلاتفورما ىرىكتەلدى. وسىنىڭ ناتيجەسىندە جاڭا جوعارى تەحنولوگيالىق كومپانيالار پايدا بولادى. ول ءۇشىن ءبىرىنشى كەزەكتە جوعارى بىلىكتى IT- ماماندار كەرەك. بۇگىنگى كۇننىڭ وزىندە ىت- ماماندارعا دەگەن جىل سايىنعى قاجەتتىلىك - 30 مىڭنان استام ادام»، - دەدى ول.