تاۋەلسىزدىكتىڭ 30 جىلدىعى: ق ر اسكەري قىزمەتشىلەرى بيىل 84 مىڭنان استام وقۋ-جاتتىعۋعا قاتىستى
نۇر-سۇلتان. قازاقپارات - بيىل تاۋەلسىزدىكتىڭ 30 جىلدىعىندا ارميانىڭ ۇدايى جاۋىنگەرلىك ازىرلىگىن قولداۋ، اسكەردىڭ جاۋىنگەرلىك ەپتىلىگىن ارتتىرۋ، اسكەري قىزمەتشىلەردى الەۋمەتتىك قامتاماسىز ەتۋ جانە جەكە قۇرامنىڭ جوعارى مورالدىق-جاۋىنگەرلىك رۋحىن قولداۋ جونىندە جۇيەلى جۇمىس جۇرگىزىلدى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
اسكەري قاۋىپسىزدىكتى قامتاماسىز ەتۋ سالاسىندا قاجەتتى ستراتەگيالىق جانە باعدارلامالىق قۇجاتتار، اتاپ وتەر بولساق، 2021-2025-جىلدارعا ارنالعان ۇلتتىق قاۋىپسىزدىك ستراتەگياسىنىڭ «ەلدىڭ قورعانىس قابىلەتىن نىعايتۋ» ءبولىمى، ەل قورعانىسىنىڭ جاڭا جوسپارى قۇجاتتارىنىڭ جيىنتىعى، قارۋلى كۇشتەردىڭ، باسقا دا اسكەرلەر مەن اسكەري قۇرالىمدارىنىڭ قۇرىلىسى مەن ونى دامىتۋدىڭ 2030-جىلعا دەيىنگى جاڭا تۇجىرىمداماسى ازىرلەندى.
قارۋلى كۇشتەردىڭ جوعارعى باس قولباسشىسىنىڭ باسشىلىعىمەن ستراتەگيالىق كوماندالىق-شتابتىق اسكەري وقۋ-جاتتىعۋ وتكىزىلدى.
اسكەري ۆەدومستۆو قىزمەتىنىڭ باسىم باعىتى وق-دارىلەردى قاۋىپسىز ساقتاۋدى قامتاماسىز ەتۋ بولىپ تابىلادى.
مەملەكەت باسشىسى «قاۋىپسىز ەل» ۇلتتىق جوباسىن بەكىتتى. تىيىم سالىنعان ايماقتار مەن اۋداندارعا بايلانىستى قاتىناستار زاڭ جۇزىندە رەتتەلدى. اسكەرلەردى جوسپارلى تۇردە قايتا جاراقتاندىرۋ اياسىندا جاڭا جانە جاڭعىرتىلعان قارۋ-جاراق پەن اسكەري تەحنيكانىڭ ۇلەسى ارتتى.
جەكە قۇرامنىڭ دەنساۋلىعىن ساقتاۋدى قامتاماسىز ەتۋ ماقساتىندا كوروناۆيرۋسقا قارسى ۆاكسيناتسيا اياقتالىپ، ريەۆاكسيناتسيا باستالدى.
«ۇلى دالا اسكەرى - تاۋەلسىزدىك تىرەگى» ۇرانىمەن اسكەري قىزمەتشىلەر 84,5 مىڭ وقۋ-جاتتىعۋ مەن جاۋىنگەرلىك وق اتۋ جاتتىعۋلارىنا قاتىستى، پاراشيۋتپەن 17,5 مىڭعا جۋىق سەكىرۋدى، 762 جازعى اۋىسىمدى، 150 تەڭىزگە شىعۋدى، 1200 دەن استام دالالىق جورىقتاردى ورىندادى.
«التىن جەبە» ارنايى وپەراتسيالار كۇشتەرىن كەشەندى تەكسەرۋى ۇيىمداستىرىلدى. 2021-جىلى قازاقستان ارمياسىنىڭ بولىمشەلەرى «قالقان» بىرلەسكەن جەدەل-تاكتيكالىق، «بەكەت» كەشەندى، «وتپانتاۋ» جەدەل-ستراتەگيالىق وقۋ-جاتتىعۋلارىنا قاتىستى.
حالىقارالىق فورماتتا قازاقستاندىق اسكەري قىزمەتشىلەر ۇ ق ش ۇ، ش ى ۇ، ناتو اۋماعىنىڭ جانە ەكى سەگمەنتتە قىتايمەن، پاكىستانمەن، رەسەيمەن، وزبەكستانمەن جانە باسقا دا ءبىرقاتار مەملەكەتتەرمەن وقۋ-جاتتىعۋلارعا قاتىستى.
اسكەريلەر شيەلەنىستى جاعدايدا كابۋلدان ازاماتتارىمىزدى ەۆاكۋاتسيالاۋ وپەراتسياسىن جۇزەگە اسىردى. قازاقستاننىڭ اسكەري قىزمەتشىلەرى ارميا حالىقارالىق ويىندارىندا تابىستى جاۋىنگەرلىك سايىس ءتۇرىن كورسەتتى.
قازاقستان كونتينگەنتىنىڭ ب ۇ ۇ- نىڭ ليۆانداعى بىتىمگەرشىلىك جانە باتىس ساحاراداعى اسكەري باقىلاۋشىلار ميسسياسىنا قاتىسۋى جالعاسۋدا. اسكەري قىزمەتشىلەردى الەۋمەتتىك قورعاۋ مەملەكەتتىڭ باستى باسىمدىقتارىنىڭ قاتارىندا.
قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا 2021-جىلدان باستاپ لاۋازىمدىق جالاقى %35 عا ءوستى. جالاقىنىڭ كەزەڭمەن ءوسۋى 2023-جىلعا دەيىنگى ارالىقتى قامتيدى.
زاڭ جۇزىندە رەزەرۆتەگى قىزمەتكە، اسكەري قىزمەتشىلەردى تۇرعىن ۇيمەن قامتاماسىز ەتۋگە، ماتەريالدىق-تەحنيكالىق قامتاماسىز ەتۋگە جانە باسقا دا وزەكتى ماسەلەلەرگە قاتىستى نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزىلدى.
2021-جىلى ارميا سپورتشىلارى 110 نان استام ماڭىزدى حالىقارالىق جانە رەسپۋبليكالىق سپورتتىق جارىستارعا قاتىسىپ، 179 التىن، 99 كۇمىس جانە 89 قولا مەدال ولجالادى. 2022-جىل قازاقستان رەسپۋبليكاسى قارۋلى كۇشتەرىنىڭ قۇرىلعانىنا 30 جىل بولىپ جاريالاندى.
ەل اسكەرىندەگى جاۋىنگەرلىك سايىستار «قارۋلى كۇشتەردىڭ 30 جىلدىعىنا - ءبىزدىڭ ەرەن ەڭبەگىمىز!» ۇرانىمەن وتەدى.
