استانادا 3 ادامدى قۇتقارعان ءورت ءسوندىرۋشى 80 پايىز كۇيىكپەن جانساقتاۋ بولىمىندە جاتىر

«كەشە استانادا ب. مومىش ۇلى داڭعىلىنداعى 15 قاباتتى ۇيدە الاپات ءورت بولدى. ءورت سوندىرۋشىلەر ءوز ءومىرىن قاتەرگە تىگىپ، بەس ادامدى امان الىپ شىعاردى. ولاردىڭ ءبىرى - اسقار زابيكۋلين زارداپ شەككەندەرگە كومەكتەسكەنىمەن، دەنەسىن قاتتى كۇيىك شالىپ، ءقازىر وتە اۋىر جاعدايدا جاتىر»، - دەپ حابارلايدى ەلوردا اكىمدىگىنىڭ رەسمي سايتى.

ءورت كوپقاباتتى ءۇيدىڭ 11-قاباتىندا تۇتانعان. اسقار زابيكۋلين پاتەرگە تەرەزە ارقىلى كىرۋ ءۇشىن قۇتقارۋ ارقانىمەن 12-قاباتتان 11-قاباتقا تۇسكەن. ىشكە ەنۋ ءۇشىن قورشاۋدى الىپ تاستاۋىنا تۋرا كەلدى، ۇستىندەگى كامۋفلياج كيىمىمەن جانىپ جاتقان پاتەرگە كىرىپ، 80 جاستاعى اجەي مەن 22 جاستاعى نەمەرەسىن وتتان شىعارعان.

سونىمەن بىرگە، ءورت ءسوندىرۋشى قويۋ تۇتىننەن شىعا الماي، بالكونعا جاسىرىنىپ قالعان 10 جاسار بالانى قۇتقارىپ ۇلگەرگەن.

«اسقار زابيكۋلين اسقان جانكەشتىلىكپەن الاپات ورتتەن بىرنەشە ادامدى قۇتقارىپ قالدى، الايدا ءوزى اۋىر جاراقات الىپ، وتە قيىن جاعدايدا جاتىر. ءورت سوندىرۋشىگە بەتتىڭ، ارقانىڭ، ءىشتىڭ، اياقتىڭ جوعارعى جانە تومەنگى جاعىنىڭ 2-3 دارەجەلى كۇيىكتەرى، كۇيىك شوگى دەگەن دياگنوز قويىلدى. زاقىمدانۋ دارەجەسى - % 80. قازىر ول وكپەنى جاساندى جەلدەتۋ اپپاراتىندا جاتىر»، - دەيدى اكىمدىك.

ايتا كەتەيىك، كەشە ەلوردادا كوپقاباتتى ۇيدە ءورت بولىپ، 3 ادام، ونىڭ ىشىندە 1 بالا اۋرۋحاناعا تۇسكەن ەدى.

فوتو: gov.kz

اۆتور

ايجان سەرىكجان قىزى