شەكسپير شىعارمالارىنىڭ جيناعى ءباسساۋدادا 3,6 ميلليون دوللارعا ساتىلدى

استانا. قازاقپارات - ۋيليام شەكسپير شىعارمالارى جيناعىنىڭ بىرەگەي العاشقى باسىلىمدارى Christie's ءباسساۋداسىندا 3,6 ميلليونعا جۋىق دوللارعا ساتىلدى.

بۇل تۋرالى ءباسساۋدا ءۇيىنىڭ سايتىندا ورنالاستىرىلعان حابارلامادا ايتىلادى، دەپ جازادى ت ا س س.

اۆتوردىڭ العاشقى ءارى ەڭ سيرەك كەزدەسەتىن شىعارمالار جيناعى 1623-جىلى جارىق كورگەن، وعان 36 پەسا كىرىپ وتىر، سونىڭ ىشىندە 18 ءى بۇعان دەيىن جاريالانباعان. باستاپقىدا باسىلىم 1,1-1,7 ميلليون دوللارعا باعالانعان، ءبىراق 2,7 ميلليون دوللارعا ساتىلدى. تاعى باسقا ءۇش فوليانت 1632، 1664 جانە 1685 -جىلدارى شىققان. ولار سايكەسىنشە 281,6 مىڭ، 524,9 مىڭ جانە 68,8 مىڭ دوللارعا ساتىلدى.

ءباسساۋدانىڭ الدىندا باسىلىمدار نيۋ-يورك جانە لوندون جۇرتشىلىعىنا تانىستىرىلدى.

The Daily Mail گازەتىنىڭ جازۋىنشا، بارلىق لوتتاردى ەسىمى اتالماعان امەريكاندىق توپتاماشى ساتىپ الدى.