تۇركىستان وبلىسىندا جول اپاتىنان قازا بولعاندار سانى 3 اي ىشىندە 66 پايىزعا وسكەن
بۇل تۋرالى تۇركىستان وبلىسى اكىمدىگى جانىنداعى قۇقىق بۇزۋشىلىق پروفيلاكتيكاسى جونىندەگى ۆەدومستۆوارالىق كوميسسياسىنىڭ ماجىلىسىندە ايتىلدى، دەپ حابارلايدى قازاقپارات ءتىلشىسى.
تۇركىستان وبلىسىنىڭ اكىمى دارحان ساتىبالدىنىڭ توراعالىعىمەن تۇركىستان وبلىسى اكىمدىگى جانىنداعى قۇقىق بۇزۋشىلىق پروفيلاكتيكاسى جونىندەگى ۆەدومستۆوارالىق كوميسسياسىنىڭ ءماجىلىسى ءوتتى. جيىننىڭ كۇن تارتىبىندە وبلىستاعى قىلمىس دەڭگەيى، قوعامدىق ورىندار مەن كوشەلەردە قوعامدىق قاۋىپسىزدىكتى قامتاماسىز ەتۋ ماسەلەسى جانە «تۇركىستان وبلىسى اكىمدىگىنىڭ جانىنان قوعامدىق قاۋىپسىزدىكتى قامتاماسىز ەتۋدە سەرۆيستىك ءتاسىلدى ەنگىزۋ جونىندەگى ۆەدومستۆوارالىق توپ قۇرۋ تۋرالى» وكىمىمەن قۇرىلعان توپتىڭ اتقارعان جۇمىسى تالقىلاندى.
قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ تۇركىستان وبلىسى بويىنشا باسقارماسىنىڭ باستىعى وركەن سەيىتوۆتىڭ ايتۋىنشا جىل باسىنان بەرگى ءۇش اي ىشىندە وبلىستاعى قىلمىستىق قۇقىق بۇزۋشىلىقتاردىڭ تىركەلۋ سانى 12 پايىزعا تومەندەگەن. الايدا قىلمىستىڭ تىركەلۋى وتىرار اۋدانىندا - 42,9 پايىز، سارىاعاشتا - 16,9 پايىز، تولەبيدە - 13,6 پايىز، جەتىسايدا 7,3 پايىزعا وسكەن. كامەلەتكە تولماعاندارمەن جاسالعان قىلمىس سانى ءبىرقاتار اۋدانداردا ءوسىم كورسەتىپ وتىر. باسقوسۋدا بايانداما جاساعان باسقارما باستىعى قۇقىق بۇزۋشىلىقتاردىڭ ستاتيستيكالىق كورسەتكىشتەرىن كوميتەتتىڭ «قامقور» اقپاراتتىق پورتالىنان ونلاين رەجيمىندە كورسەتىپ، بۇل اقپاراتتاردىڭ قولجەتىمدىلىگىن اتاپ ءوتتى.
تۇركىستان وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى باعلانبەك ايتپايەۆتىڭ بايانداۋىنشا، جالپى قابىلدانىپ جاتقان شارالاردىڭ ناتيجەسىندە وڭىردە اسا اۋىر جانە اۋىر قىلمىستاردىڭ سانى 14,3 پايىزعا، اۋىر قىلمىستاردىڭ - 15,1 پايىزعا، ورتا جانە اۋىر ەمەس قىلمىستار 8,1 پايىزعا تومەندەگەن. سونداي-اق قاساقانا كىسى ءولتىرۋ، دەنساۋلىققا اۋىر زيان كەلتىرۋ، زورلاۋ، قاراقشىلىق شابۋىل جاساۋ، توناۋ، بۇزاقىلىق پەن ەسىرتكى قىلمىستارى بويىنشا اشىلىم 100 پايىزدى قۇراعان.
ءبىرىنشى توقسان قورىتىندىسىمەن قوعامدىق ورىندا جاسالعان قىلمىستار 28 پايىزعا تومەندەگەن. وبلىستا جول كولىك وقيعالار سانى 4,5 پايىزعا، جاراقان العاندار سانى 16,8 پايىزعا تومەندەگەن، ال جول اپاتتارىنان قازا بولعاندار سانى 66 پايىزعا وسكەن. ءۇش ايدا 150 مىڭعا جۋىق اكىمشىلىك قۇقىق بۇزۋشىلىق انىقتالىپ، 2 ميلليارد تەڭگەگە جۋىق ايىپپۇل سالىنعان.
كوميسسيا وتىرىسىندا وبلىس اكىمى دارحان ساتىبالدى اۋدان، قالا اكىمدەرىنە پوليتسيا ورگاندارىمەن بىرلەسە وتىرىپ، قىلمىستاردىڭ الدىن الۋ ءۇشىن ناقتى ءىس-شارا جوسپارىن ازىرلەپ، ۇسىنۋدى تاپسىردى. كامەلەتكە تولماعاندارمەن جاسالعان قىلمىس سانىنىڭ ءبىرقاتار اۋدانداردا وسۋىنە بايلانىستى الداعى جازعى دەمالىس كەزىندە بالالاردىڭ قاۋىپسىزدىگىن قامتاماسىز ەتۋ بويىنشا ناقتى شارالار قابىلداۋدى جۇكتەدى. سونداي-اق قۇقىق بۇزۋشىلىق پروفيلاكتيكاسى بويىنشا جۇمىستاردى كۇشەيتۋدى تاپسىردى.
بۇگىندە تۇركىستاندا سەرۆيستىك پوليتسيا مودەلى كەزەڭ- كەزەڭىمەن جۇزەگە اسىرىلۋدا. ونىڭ جۇمىسى جايلى تۇركىستان وبلىسى پوليتسيا دەپارتامەنتىنىڭ جەرگىلىكتى پوليتسيا قىزمەتىنىڭ باستىعى اسىلحان تورەحانوۆ باياندادى.
قوعامداعى قاۋىپسىزدىكتى قامتاماسىز ەتۋدىڭ وڭتايلى ءتاسىلى - پوليتسيا سەرۆيستىك مودەلى بويىنشا پيلوتتىق جوبا تۇركىستان قالاسىندا 2021 -جىلى جۇزەگە اسىرىلعان. جوبانى ماسشتابتاۋ ءۇشىن قازىرگى تاڭدا تۇركىستان وبلىسىنىڭ اۋدان، قالالارىندا سەرۆيستىك ءتاسىلدى ەنگىزۋ جونىندەگى ۆەدومستۆوارالىق توپتار قۇرىلىپ، جۇمىستار اتقارىلۋدا. ءوڭىر باسشىسى بۇل باعىتتاعى ءبىرقاتار جۇمىستاردى سىنعا الدى.
«كەنتاۋ قالاسى، ماقتاارال، وتىرار، بايدىبەك، قازىعۇرت، سوزاق، سايرام اۋداندارىندا بۇل باعىتتاعى جۇمىس ويداعىداي بولماي تۇر. اۋدان، قالا اكىمدەرى وسى جۇمىس توبىمەن بىرلەسە جۇمىس اتقارىپ، تۇرعىنداردىڭ قاۋىپسىزدىگى مەن قۇقىعىن قورعاۋ ماسەلەسىن جەكە باقىلاۋعا الىڭىزدار»، - دەگەن دارحان ساتىبالدى قىلمىستى تومەندەتۋ بويىنشا ءتيىستى مەملەكەتتىك ورگاندارمەن بىرلەسە ناقتى شارالار قابىلداۋدى، وسى باعىتتا جۇمىستى جالعاستىرىپ، قوعامدىق قاۋىپسىزدىكتى قاتاڭ باقىلاۋدا ۇستاۋدى تاپسىردى.
