سوڭعى 3 جىلدا قازاقستان پاتەنتتىك كووپەراتسيا تۋرالى شارت بويىنشا 60 ءوتىنىش بەرگەن
بۇل تۋرالى پاتەنتتىك كووپەراتسيا تۋرالى شارت ماسەلەلەرى بويىنشا سۋبايماقتىق سەمينار بارىسىندا ق ر ادىلەت ءمينيسترىنىڭ ورىنباسارى ەلۆيرا ءازىموۆا ءمالىم ەتتى.
«دامىعان 30 ەلدىڭ قاتارىنا قوسىلۋ ءۇشىن قازاقستان يندۋستريالدۋ- يننوۆاتسيالىق تەحنولوگيالاردى دامىتىپ، وسى سالاداعى زياتكەرلىك مەنشىكتى قورعاۋ بويىنشا دارەجەسىن كوتەرۋى كەرەك. الەمدەگى تاجىريبە كورسەتىپ وتىرعانداي، زياتكەرلىك مەنشىكتى قورعاۋ كەز كەلگەن ەلدىڭ ەكونوميكاسىن دامىتسا، ءبىزدىڭ ەلدە قازاق ونەرتاپقىشتارىن ىنتالاندىرا تۇسپەك.
بۇل رەتتە، پاتەنتتىك كووپەراتسيا تۋرالى شارت ءبىر مەملەكەت اياسىندا عانا ەمەس، حالىقارالىق دەڭگەيدە پاتەنتتەردى قورعايدى. سوڭعى ءۇش جىلدا قازاقستان پاتەنتتىك كووپەراتسيا تۋرالى شارت بويىنشا 60 حالىقارالىق ءوتىنىش بەرگەن. بۇل رەتتە ايتا كەتەرلىگى، وسى شارت بويىنشا بەرگەن وتىنىشتەردىڭ سانى دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىنىڭ «1 ميلليون حالىققا پاتەنت» دەگەن يندەكسى بويىنشا قازاقستاننىڭ كورسەتكىشىن جاقسارتۋعا ىقپال ەتەدى. دال قازىر قازاقستان وسى يندەكس بويىنشا 68- ورىندا تۇر»، - دەپ حابارلادى ءمينيستردىڭ ورىنباسارى.
ايتا كەتەيىك، كەشەدەن بەرى استانادا «پاتەنتتىك كووپەراتسيا تۋرالى شارت جونىندەگى ماسەلەلەر بويىنشا» سۋب ايماقتىق سەمينار ءوتىپ جاتىر. شارانى ق ر ادىلەت مينيسترلىگى، وسى مينيسترلىككە قاراستى ۇلتتىق زياتكەرلىك مەنشىك ينستيتۋتى مەن دۇنيەجۇزىلىك زياتكەرلىك مەنشىك ينستيتۋتى ۇيىمداستىرىپ وتىر.
اۆتور: كەنجەكەي توقتامۇرات قىزى
