كوروناۆيرۋس: كارانتين تالابىن بۇزعاندارعا 3,5 مىڭ دوللار ايىپپۇل سالىنادى
ب ۇ ۇ بارلىق ۇكىمەتتى وقۋشىلاردى مەكتەپكە قايتارۋدى، وقۋلارىن جالعاستىرۋعا شاقىردى.
اۆستراليا كارانتيندى بۇزعاندارعا 3,5 مىڭ ا ق ش دوللارى كولەمىندە ايىپپۇل ەنگىزدى.
ءۇندىستاندا پاندەميا باستالعالى ىندەت جۇقىرۋدىڭ ەڭ جوعارى كورسەتكىشى تىركەلدى، دەپ حابارلايدى قازاقپارات BBC گە سىلتەمە جاساپ.
ب ۇ ۇ باس حاتشىسى انتونيۋ گۋتەرريش سەيسەنبى كۇنى ءبىلىم بەرۋدەگى كوروناۆيرۋستىڭ سالدارىنان تۋىنداعان «ءۇزىلىس» پلانەتانىڭ بۇتىندەي ءبىر بۋىنى ءۇشىن ۇلكەن قاۋىپ بولعالى وتىرعاندىعىن ايتتى.
وقۋشىلاردىڭ مەكتەپكە ورالۋى جانە وسى رەتتەگى قاۋىپسىزدىك باستى قازىرگى تاڭدا باستى ماسەلە بولۋى كەرەك، دەپ اتاپ ءوتتى ول ب ۇ ۇ سايتىندا جاريالانعان ءوزىنىڭ بەينەحابارلاماسىندا.
شىلدە ايىنىڭ ورتاسىنداعى جاعداي بويىنشا 160 ەلدىڭ شامامەن 1 ميلليارد وقۋشىسى ءۇشىن مەكتەپتەر جابىق، ال 40 ميلليونعا جۋىق بالا مەكتەپكە دەيىنگى ءبىلىم بەرۋ مەكەمەلەرىنە بارا الماي قالدى، دەپ اتاپ ءوتتى گۋتەرريش.
سونىمەن قاتار، ىندەت تاراعانعا دەيىن 250 ميلليون بالا ءبىلىم الا الماعان بولاتىن، ال دامۋشى ەلدەردىڭ ورتا مەكتەپ وقۋشىلارىنىڭ تورتتەن ءۇش بولىگى مەكتەپتەردەن ءتىپتى بازالىق ءبىلىم الماي جاتىپ كەتۋگە ءماجبۇر بولعان.
سوڭعى تاۋلىكتە ءۇندىستاندا وزگە ەلدەرمەن سالىستىرعاندا، كوروناۆيرۋس جۇقتىرۋدىڭ جاڭا جاعدايلارى كوبىرەك تىركەلدى. دۇيسەنبى كۇنى ءۇندىستاننىڭ 50 مىڭنان استام تۇرعىنىنان اۋرۋ انىقتالسا، كوروناۆيرۋس دياگنوزى راستالعان 800 دەن استام ادام كوز جۇمعان.
اۋستراليانىڭ ۆيكتوريا شتاتى كوروناۆيرۋسقا بايلانىستى وقشاۋلاۋ رەجيمىن بۇزعاندارعا جاڭا جازا تاعايىندالعانى تۋرالى جاريالادى. ۇستالعان زاڭ بۇزۋشىلارعا سول جەردە 5 مىڭ اۆستراليا دوللارى (شامامەن 3,5 مىڭ ا ق ش دوللارى) كولەمىندە ايىپپۇل سالىنۋى مۇمكىن. وسى ماقساتتا شتات كوشەلەرىنە 500 اسكەري قىزمەتشى جىبەرىلەدى.
فرانسيا ۇكىمەتى جانىنداعى عىلىمي كەڭەس كۇزدە نەمەسە قىستا ەلدە كوروناۆيرۋستىڭ ەكىنشى تولقىنىنىڭ پايدا بولۋ قاۋپى وتە جوعارى ەكەنىن ەسكەرتتى.
سوڭعى اپتادا ەلدە جاڭا جاعدايلاردىڭ سانى كوبەيە باستادى. سوڭعى ءۇش كۇندە 3,4 مىڭعا جۋىق جاعداي تىركەلدى، رەانيماتسيا بولىمشەلەرىندەگى پاتسيەنتتەر سانى دا ءوستى. سوڭعى اپتادا اۋرۋعا شالدىعۋدىڭ جاڭا جاعدايلارىنىڭ ءوسۋى ەۋروپانىڭ باسقا ەلدەرىندە دە، ونىڭ ىشىندە بەلگيا، ليۋكسەمبۋرگ جانە يسپانيادا انىقتالدى.
سەيسەنبىدە پولشادا كوروناۆيرۋس جۇقتىرۋدىڭ ءتورتىنشى رەكوردتىق كورسەتكىشى تىركەلدى. ءبىر كۇندە 680 جاڭا جاعدايى انىقتالىپ، التى ادام قايتىس بولدى. سەيسەنبىدەن باستاپ ونداعان ميلليون فيليپپين ازاماتى قايتادان كارانتينگە الىندى.
ۇيلەرىنەن كەتپەۋ تۋرالى بۇيرىق ەل استاناسى مانيلا مەن ونىڭ اينالاسىنا تاراتىلدى. جەكسەنبىدە ەلدىڭ دارىگەرلەرى پرەزيدەنت رودريگو دۋتەرتتى دەنساۋلىق ساقتاۋ جۇيەسىنىڭ قۇلدىراۋىنا جول بەرمەۋگە شاقىردى.
