بالاسىن اسىراپ الۋشىلارعا بەرەتىن ايەلدىڭ بەينەجازباسى 3,5 ميلليون ادامدى تەبىرەنتتى - فوتو
سەبەبى، ول بالاسىن اسىراپ الۋشىلارعا بەرۋگە ءماجبۇر بولدى. ايەلدىڭ بالاسىنا ارناپ تۇسىرگەن بەينەجازباسى جەلىگە تاراپ، 3,5 ميلليوننان استام قارالىم جينادى.
بۇل تۋرالى bigpicture.ru جازدى.
حاننا مونگيدىڭ 18 جاسىندا اياعى اۋىر بولىپ قالعان. ال، سول كەزدە كۇيەۋى كەيدەننىڭ جاسى 20-دا بولعان. ولار بالالى بولاتىندارىن بىلگەننەن كەيىن، وزدەرى ءالى جاس بولعاندىقتان ونى اسىراپ الۋشىلارعا بەرەمىز دەپ شەشكەن. سەبەبى، ەكەۋى دە وتە جاس، ءبىلىمى جوق، جۇمىسسىز جانە ءۇيسىز بولدى. الايدا، كەيدەننىڭ جۇرەگى توقتاپ قالىپ، ومىردەن ءوتتى. سوندا دا ايەل بالاسىن اسىراپ الۋشىلارعا بەرەمىز دەگەن رايىنان قايتپاعان. بۇل بالا ءۇشىن دە دۇرىس شەشىم بولادى دەگەن بايلامعا كەلەدى.
«مەن ءومىر بويى انا بولۋدى ارماندادىم. تەك، ءدال قازىرگى ۋاقىتتا ەمەس. كەيدەنمەن ەكى اي عانا كەزدەستىك. بىزگە ۇيلەنۋگە دە، بالالى بولۋعا دا ەرتە بولدى. ۇزاق ويلاندىق. سوسىن كەيدەن «ءبىز نە ىستەسەك تە بالاعا جاقسى بولاتىن جاعىن ويلاۋىمىز كەرەك» دەدى. بىزدىڭشە، تەك دۇرىس شەشىم ونى اسىراپ الۋشىلارعا بەرۋ بولدى.
كەيدەننىڭ اناسى مەنىڭ اناما ونىڭ ولگەنى تۋرالى ەستىرتكەندە مەن قاتتى قينالدىم. ونىڭ ولىمىنەن كەيىن مەن توسەكتەن تۇرا الماي جاتىپ قالدىم. اتا-انام مەنىڭ جاعدايىمدى ۋايىمداي باستادى. سوندا دا ولار ماعان دەمەۋ بولىپ، ۇنەمى بالانى اسىراۋشىلارعا بەرۋ تۋرالى ەسىمە سالىپ وتىردى. اكەم «ءبىزدىڭ بالامىز باقىتتى ءومىر سۇرۋگە، تاڭەرتەڭ ۇيقىدان تۇرعاندا ءوز توسەگىنەن ويانۋعا جانە ونى جاقسى كورەتىن اتا-اناسى بولۋعا ابدەن لايىقتى» دەدى. مەن قاتتى كۇيزەلىسكە ۇشىرادىم. ءبىراق ءوز بالامدى باسقالارعا بەرەتىن كۇندە جەتتى. بۇل شەشىم ول ءۇشىن جاقسى بولادى»، - دەيدى حاننا.
بالا دۇنيەگە كەلگەننەن كەيىن حاننانىڭ ونىمەن بىرگە وتكىزەتىن 48 ساعات قانا ۋاقىتى قالدى. سوسىن ونى جاڭا اتا-اناسى برەد پەن ەميلي مارشتارعا تاپسىرۋعا ءماجبۇر.
ايەل سول 48 ساعاتتا بالاسىنا ارناپ بەينەجازبا تۇسىرۋمەن اينالىستى. وندا بالاسىنا نەگە باسقا وتباسىعا بەرگەنىن، نەگە مۇنداي شەشىمگە بارعانىن تۇسىندىرگەن.
«ماعان وتە قيىن بولدى. مەن ۇنەمى كەيدەندى ويلادىم. ال تاگگارت ونىڭ ءبىر بولشەگى ەدى. بالام وسكەسىن وسى كەزدەگى مەنىڭ جاعدايىما تۇسىنىستىكپەن قاراعانىن قالايمىن. وسىنداي شەشىمگە بارعان كوپتەگەن اتا-انالار حات جازىپ جاتادى ءبىراق مەن بەينەجازبا قالدىرۋدى شەشتىم».
«ەگەر مەن سەنى جاقسى كورمەسەم، سەنى دۇنيەگە اكەلمەس ەدىم، جانە سەنىڭ قازىرگىدەي وتباسىڭ دا بولماس ەدى. مەن سەنى جاقسى كورەمىن تاگگارت كەيدەن مارش»، - دەدى بەينەجازبادا حاننا.
باقىتىنا وراي، حانا مارشتار وتباسىمەن بالاسىن كورىپ تۇرۋعا كەلىسىم جاساعان. قازىر تاگگارتتىڭ جاسى ەكىدە. حاننا بالاسىن باعۋعا بارىپ تۇرادى.
ەميلي مەن برەدتىڭ 3 بالاسى بار. ولاردىڭ بارلىعىن اسىراپ العان. ەميليدىڭ ايتۋىنشا، ۇلكەن ۇلىنىڭ بيولوگيالىق اناسى حات جازىپ كەتكەن. ول ەر جەتكەسىن حاتتى وقىتامىن دەپ وتىر. ول حاننانىڭ ۆيدەوسى وتە ەرەكشە ەكەنىن ايتتى.
«مەنىڭ اتا-انام ەميلي مەن برەدتىڭ بالالارىن ءوز نەمەرەلەرىندەي كورەدى. ءار مەرەكە سايىن سىيلىقتار بەرىپ، كەزدەسىپ تۇرامىز. ەميلي مەن ءۇشىن ەڭ جاقىن دوسىمداي بولىپ كەتتى. ونى ماقتان تۇتامىن»، - دەيدى حاننا.
بەينەجازبانى حاننا ءوزى تۇسىرگەن. ول Facebook-تەگى Love What Matters جوباسىندا جاريالانىپ، 3,5 ميلليون قارالىم جيناعان.
حاننا جەلى وقىرماندارىنان مۇنداي ناتيجە كۇتپەگەن. ول وسى وقيعا بالا اسىراپ الۋدى ويلايتىندارعا ساباق بولعانىن قالايدى.
