پاۆلودار وبلىسىندا 3,5 مىڭعا جۋىق بوس جۇمىس ورنى بار
بۇل تۋرالى كەشە وبلىستىق جۇمىس پەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى مەرۋەرت ەسەمبايەۆا «سەرپىن-2050» باعدارلاماسىمەن كەلگەن جاستارمەن كەزدەسۋ بارىسىندا ايتتى.
«بىزگە جەتىسپەيتىن ماماندىقتاردىڭ كوبىسى ءبىلىم بەرۋ، دەنساۋلىق ساقتاۋ جانە اۋىل شارۋاشىلىعى سالالارى بويىنشا بولىپ وتىر»، - دەيدى مەرۋەرت سەيىتبەك قىزى.
«وسىنداعى مامان تاپشىلىعىن جابۋ ماقساتىندا بىلتىر ۇكىمەت تاراپىنان «ناتيجەلى جۇمىسپەن قامتۋدى ۇيلەستىرۋ جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعا مەملەكەتتىك باعدارلاماسى» قابىلدانعان. ماقساتى - ەلىمىزدىڭ جۇمىس كۇشى تاپشى وڭىرلەرىن قاجەتتى ماماندارمەن قامتاماسىز ەتۋ جانە ءوز ەركىمەن قونىس اۋدارۋعا جاردەمدەسۋ. وعان قازاقستان رەسپۋبليكاسىنىڭ ازاماتتارى مەن ورالماندار قاتىسا الادى.
قازىر وسى جوبا بويىنشا، وڭتۇستىكتەن سولتۇستىككە قونىس اۋدارۋشىلار مەن شەتتەن كەلگەن ورالمانداردى قابىلداۋدامىز. ناقتىراق ايتقاندا، بيىل پاۆلودار وبلىسىنا باسقا وبلىستاردان قونىس اۋدارۋشىلاردى قابىلداۋ ءۇشىن 50 وتباسىنا وڭىرلىك كۆوتا بەرىلگەن بولسا، ورالمانداردى قابىلداۋ ءۇشىن 100 وتباسىنا قاراجات ءبولىندى. بيىل ءبىزدىڭ وڭىرگە باسقا وبلىستاردان 50 وتباسى كوشىپ كەلىپ وزدەرىنە تيەسىلى جەڭىلدىكتەرىن العان، ياعني، ىشكى كوشى- قونعا بەرىلگەن قاراجات تولىقتاي يگەرىلدى. سونىمەن قاتار، تاعى 20 وتباسى كەزەكتە تۇر. ولاردىڭ ماسەلەسى كەلەر جىلعى بيۋدجەتپەن شەشىلمەك».
مامانداردىڭ سوزىنشە، كەلەسى جىلى 450 وتباسىن، 1800-گە جۋىق ادامدى قابىلداۋعا ۇكىمەتكە ۇسىنىس جاسالعان. سونىمەن قاتار، «سەرپىن» باعدارلاماسىن نەگىزگە الا وتىرىپ، جالعىزباستى ماماندارعا دا قولداۋ كورسەتۋ قاراستىرىلۋدا.
- ءبىزدىڭ ماماندار وتكەن ايدىڭ سوڭىندا اۋىلدىق جەرلەردە ورنالاسقان 178 جۇمىس بەرۋشىمەن كەزدەسكەن بولاتىن. سونىڭ ناتيجەسىندە 490 جۇمىس ورىنى بوس تۇرعانى بەلگىلى بولدى. ونىڭ 158- ءى ناقتى ماماندىق يەلەرى بولىپ تابىلدى. مۇنداي قىزمەتكەرلەرگە باسپانا بەرىلەدى. سوندىقتان سىزدەر ەرتەڭ وقۋلارىڭىزدى بىتىرگەن سوڭ جۇمىسقا ورنالاسىپ، ءبىزدىڭ ءوڭىردى تۇبەگەيلى مەكەندەپ قالۋلارىڭىزعا ابدەن بولادى. اسىرەسە، اۋىلدىق جەرلەرگە بارعان جاس ماماندارعا باسپانالى بولۋعا مۇمكىندىك زور، - دەپ اتاپ ءوتتى مەرۋەرت ەسەمبايەۆا.
