استاناداعى «دۋمان» ويىن-ساۋىق ورتالىعى 3,5 ميلليارد تەڭگەگە ساتىلىپ كەتتى
ساۋدا بۇگىن، 12- ساۋىردە اياقتالدى. بارلىعى ەكى ءوتىنىم كەلىپ تۇسكەن، دەپ حابارلايدى BNews.kz.
ەلەكتروندىق تەندەردىڭ اياقتالعانى جونىندە اقپارات gosreestr.kz سايتىندا جاريالاندى. ايتا كەتەيىك، لوتتىڭ باستاپقى باعاسى 3 ميلليارد 403 ميلليون 306 مىڭ 144 تەڭگەنى قۇراعان بولاتىن. ويىن-ساۋىق ورتالىعىنىڭ جالپى اۋماعى 29 مىڭ شارشى مەتردەن اسادى. ساۋداعا قاتىسۋشىلار ءۇشىن كەپىلدىك جارنا 63 ميلليون 630 مىڭ تەڭگە بولدى.
ەستەرىڭىزگە سالا كەتەيىك، بۇعان دەيىن اگەنتتىك حابارلاعانداي، ساتۋشىنىڭ تالاپتارى بويىنشا ساتىپ الۋشى نىساننىڭ پروفيلدىك قىزمەتىن كەمىندە 10 جىل ساقتاۋى ءتيىس. سونداي-اق مۇحيت ارالى مەن «دجۋنگلي» اتتراكتسيونىنىڭ جۇمىسى قامتاماسىز ەتىلىپ، مۇحيت ارالىنداعى تروپيكالىق (امازونكا، وڭتۇستىك-شىعىس ازيا جانە ت. ب. باسسەيندەردەن اكەلىنگەن اكۋلالار) جانە جەرگىلىكتى بالىق تۇرلەرى ساقتالۋى ءتيىس.
ساتىپ الۋشىنىڭ مىندەتتى تۇردە ۆەتەرينارلارى، يحتيولوگتارى مەن سۇڭگۋىر قىزمەتى بولۋى تالاپ ەتىلدى. سونداي-اق، جاڭا قوجايىن «دۋمان» ويىن-ساۋىق ورتالىعىن جاڭعىرتىپ، عيماراتقا جوندەۋ جۇرگىزىپ، بالالارعا ارنالعان اتتراكتسيون ورناتۋى ءتيىس.
2003-جىلى اشىلعان «دۋمان» ويىن-ساۋىق ورتالىعىندا مۇحيت ارالى، «دجۋنگلي» انيماترونيكستەر تەاترى، 5D كينوتەاترى، كادەسىيلار دۇكەنى، ەكزوتاريۋم-زووباق بار.
ويىن-ساۋىق ورتالىعى استانا قالاسىنىڭ كوممۋنالدىق مۇلىك جانە مەملەكەتتىك ساتىپ الۋلار باسقارماسىنىڭ مەنشىگىندە بولىپ كەلدى.
