ۇلتتىق بانكتىڭ ءتوراعاسى تەڭگەنىڭ الداعى 3-5 اي ىشىندەگى باعامى تۋرالى ايتتى

الماتى. قازاقپارات - ق ر ۇلتتىق بانكىنىڭ ءتوراعاسى قايرات كەلىمبەتوۆ بۇگىن الماتىدا حالىقارالىق ۆاليۋتا قورىنىڭ ورتالىق ازيا جانە كاۆكاز وڭىرىنە ارنالعان «وڭىرلىك ەكونوميكالاردىڭ دامۋ كەلەشەگى» اتتى بايانداماسىنىڭ تانىستىرىلىمى بارىسىندا تەڭگەنىڭ باعامى الداعى 3-5 اي ىشىندە تۇراقتاناتىندىعىن جەتكىزدى.

ونىڭ ايتۋىنشا، تەڭگەنىڭ باعامى 250-270 تەڭگە كولەمىندە بولۋى مۇمكىن. ال ينفلياتسيانى تارگەتتەۋ ماقساتىندا بازالىق مولشەرلەمە جوعارى دەڭگەيدە بولادى.

«تەڭگە باعامى الداعى ءۇش، ارى كەتسە، بەس اي ىشىندە تۇراقتانادى. سوندىقتان جوعارى ەكونوميكالىق وسىمگە قول جەتكىزۋ ءۇشىن ءبىز نەسيەلەندىرۋ شاراسىن كەڭەيتۋىمىز كەرەك. تامىز، قىركۇيەك ايلارىندا ۆاليۋتا باعامى 257 تەڭگەنى قۇراعان ەدى. كەيىن 210 تەڭگەگە ءتۇسىپ كەتتى. بۇدان كەيىن 250 تەڭگەگە قايتا كوتەرىلدى. ال ۆاليۋتا نارىعى ءتيىمدى مە؟ ۆاليۋتا باعامى تەڭگە مەن دوللارعا قاتىستى سۇرانىس پەن ۇسىنىستىڭ ناتيجەسىندە قالىپتاسىپ جاتىر ما؟ جوق. ويتكەنى، بۇگىندە ۆاليۋتا نارىعىندا 100-200 ميلليون دوللار عانا ساتىلىمعا تۇسەدى. ال بۇل كوپ ەمەس»، - دەدى ق ر ۇلتتىق بانكىنىڭ ءتوراعاسى.

اۆتور: جاپپاربەرگەن ايبوتا