قازاقستاندا اسكەردەن قاشقان ازاماتتار 3,5 ميلليون تەڭگە ايىپپۇل تولەيدى
بۇل جونىندە ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە ق ر قارۋلى كۇشتەرى قاتارىنا جەدەل اسكەري قىزمەتكە كۇزگى شاقىرۋدىڭ بارىسى جونىندە وتكەن باسپا ءسوز ءماسليحاتىندا استانا قالاسى قورعانىس ىستەرى جونىندەگى دەپارتامەنت باسشىسى تالعات امانگەلديەۆ مالىمدەدى، دەپ حابارلايدى BNews.kz تىلشىسى.
«كوماندانى جاساقتاۋ الدىندا ءبىز اسكەريلەردى مىندەتتى تۇردە ەسىرتكى زاتتارىنا تەستىلەۋدەن وتكىزەمىز. تەستىلەۋ جۇرگىزىلگەننەن كەيىن عانا ول كومانداعا قوسىلادى. ال بۇگىنگى كۇنگە دەيىن ەسىرتكىگە تاۋەلدى ازاماتتاردى ءبىز تەست ارقىلى انىقتاپ، ولاردىڭ تىزىمىن ناركولوگ-دارىگەرگە تاپسىرامىز»، - دەيدى ت. امانگەلديەۆ.
بريفينگتە ءمالىم بولعانداي، بيىلعى جىلدىڭ 1- قازانىنان باستاپ باس شتابتا جەدەل جەلى ىسكە قوسىلعان. جەدەل جەلىگە تەلەفون شالۋ ارقىلى كەز-كەلگەن ازامات اسكەري بورىشىن وتەۋگە قاتىستى وزىنە قىزىقتى مالىمەتتەرگە جاۋاپ الا الادى.
«وتكەن جىلى قابىلدانعان قىلمىستىق كودەكستىڭ 387-بابى بويىنشا زاڭدى سەبەپتەرسىز اسكەري قىزمەتتەن جالتارعانى ءۇشىن، سونىڭ ىشىندە ءوز دەنساۋلىعىنا قاساقانا زيان كەلتىرۋ نەمەسە قۇجاتتاردى بۇرمالاۋ بويىنشا اسكەري بورىشىن وتەۋدەن باس تارتسا، وندا بۇل ارەكەتى ءۇشىن 1 مىڭ ا ە ك كولەمىندە ايىپپۇل قاراستىرىلعان. بۇل شامامەن 3,5 ميلليون تەڭگە»، - دەگەن ول ازاماتتاردىڭ اسكەردەن جالتارماۋى ءۇشىن ولاردىڭ وزدەرىمەن، اتا-انالارمەن تۇراقتى تۇردە ءتۇسىندىرۋ جۇمىستارى جۇرگىزىلەتىنىن ايتتى.
اقمارال شاعاتاي
