كۇدىكتىلەردى ۇرىپ-سوققان پوليتسەيلەر 3، 4 جىلدان سوتتالدى

ساۋران اۋداندىق پوليتسيا باسقارماسىنىڭ التى قىزمەتكەرى ۇكىم وقىلىپ جاتقان كەزدە قورشاۋدى سىندىرىپ شىعىپ، قاراۋىلعا شابۋىل جاسادى.
بۇل تۋرالى ktk.kz ارناسىنا سىلتەمە جاساپ حابارلايدى.
ساۋران اۋداندىق پوليتسيا باسقارماسىنىڭ بۇرىنعى قىزمەتكەرلەرى «ەكى قوي ۇرلادى» دەگەن كۇدىكپەن بىلتىر اقپان ايىندا 2 ازاماتتى ۇستاعان. كەيىن ولاردى پوليتسيا عيماراتىنا جەتكىزىپ، ۇرىپ-سوعىپتى.
ءتىپتى باسىنا پاكەت كيگىزىپ قيناعانى الەۋمەتتىك جەلىلەرگە تارالعان بولاتىن. وسىدان كەيىن تەكسەرىس باستالىپ، كۇدىكتىلەردىڭ ۇرلىققا قاتىسى جوق ەكەنى انىقتالدى. كەيىن جابىرلەنۋشى وزىنە كۇش قولدانعان التى پوليتسەيدىڭ ۇستىنەن ارىز جازدى.
وسى ءىستى ءبىر جىل قاراعان سوت بۇگىن ەكس-پوليتسەيلەردى كىنالى دەپ تاۋىپ بەكزات قۇدايقۇل، ازامات مەيىرمان، ەرسەيىت ەدەنوۆ پەن بەكسۇلتان وسەربايدى 4 جىلعا، تاعى ەكى قىزمەتكەرگە 3 جارىم جىل جازا كەستى. ولار تۇرمەدەن شىققان سوڭ دا 3 جىل قۇقىق قورعاۋ ورگاندارىندا جۇمىس ىستەي المايدى.
سونداي-اق سوتتالۋشىلار جابىرلەنۋشىنىڭ بىرىنە 2 جارىم ميلليون، ەكىنشىسىنە 3 ميلليون تەڭگە مورالدىق شىعىن تولەۋگە مىندەتتەلدى. ءبىراق، سوتتالۋشىلاردىڭ ەشقايسىسى ۇكىممەن كەلىسپەدى.