جەر بەتىنىڭ 3/4 جانە مۇحيتتىڭ 2/3 بولىگىنە ادامزات زالال كەلتىرىپ وتىر

بەرلين. قازاقپارات - بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش كليمات، مۇحيت نەمەسە بيوالۋانتۇرلىلىك بويىنشا ءتۇرلى كونفەرەنسيالارعا قاتىسۋشىلاردىڭ تابيعاتتى قورعاۋ سالاسىنداعى مىندەتتەمەلەردى قابىلداۋعا ازىرلىگىن قۇپتايدى، ءبىراق بوس ۋادەلەردەن اۋلاق بولۋعا ۇندەيدى.

بۇل تۋرالى ول قورشاعان ورتانى قورعاۋ ماسەلەلەرىنە ارنالعان جوعارى دەڭگەيدەگى جيىندا باس اسسامبلەيا دەلەگاتتارى الدىندا سويلەگەن سوزىندە ايتتى، دەپ حابارلايدى قازاقپارات ب ۇ ۇ جاڭالىقتار ورتالىعىنا سىلتەمە جاساپ.

باس حاتشى ءوز سوزىندە تاعى دا دابىل قاقتى - قورشاعان ورتانىڭ جاعدايى ناشارلاپ بارادى، وسىمدىكتەر مەن جانۋارلاردىڭ ميلليونداعان ءتۇرى جويىلۋ الدىندا تۇر، ال پلانەتا كليماتتىڭ وزگەرۋى، الۋانتۇرلىلىكتىڭ جوعالۋى جانە لاستانۋىنا بايلانىستى ءۇش ەسە داعدارىستى باستان كەشىپ وتىر. «بۇل شىعىنداردىڭ باستى سەبەبى - جاھاندىق ازىق- تۇلىك جۇيەسى. جەر بەتىنىڭ تورتتەن ءۇش، مۇحيتتىڭ ۇشتەن ەكى بولىگىنە ادام ارەكەتىنىڭ كەرى اسەرى ءتيىپ وتىر. جەردىڭ توزۋى پلانەتاداعى 3,2 ميلليارد ادامعا اسەر ەتۋدە. ونىڭ بارلىعىنا ادامنىڭ ءومىر ءسۇرۋ سالتى، قالاي ءوندىرىپ، تۇتىنىپ جۇرگەنى، قورشاعان ورتانى لاستاۋى سەبەپ»، - دەپ اتاپ ءوتتى گۋتەرريش.

دەگەنمەن، جاعدايدى ادامنىڭ ءوزى دە تۇزەتە الادى. ب ۇ ۇ باسشىسى بۇل ءۇشىن شارالار قابىلدايتىن ۋاقىت جەتكەنىن قاداپ ايتتى.

«تابيعاتقا دەگەن كوزقاراستى وزگەرتىپ، دامۋدىڭ جاڭا تراەكتورياسىن تابۋ كەرەك»، - دەپ ەسكەرتتى انتونيۋ گۋتەرريش.

اتاپ ايتقاندا، ول جىلىنۋدى سەلسي بويىنشا 1,5 گرادۋس شاماسىندا ساقتاۋ قاجەتتىگىن ەسكە سالدى.

ب ۇ ۇ باسشىسى بيىل مىسىردا وتەتىن «ك س-27» كليماتقا قاتىستى كونفەرەنسياعا ۇلكەن ءۇمىت ارتىپ وتىر. ول فورۋمعا قاتىسۋشىلاردى 2030 -جىلعا قاراي قالدىقتار كولەمىن %45 عا قىسقارتۋعا جانە عاسىردىڭ ورتاسىنا قاراي نولدىك ەميسسياعا قول جەتكىزۋگە مىندەتتەمە الاتىنىن كۇتۋدە. «بۇگىنگى مىندەتتەمەلەر ورىندالسا دا، اعىمداعى ونجىلدىقتا شىعارىندىلار كولەمىنىڭ %14 عا ارتۋىنا اكەلەدى. بۇل جاعداي اپاتقا اكەپ سوقتىرادى»، - دەدى ب ۇ ۇ باس حاتشىسى.

گۋتەرريش سونىمەن قاتار بيوالۋانتۇرلىلىكتى قورعاۋ ماسەلەلەرى بويىنشا شەشۋشى ارەكەتكە، اتاپ ايتقاندا، 2030 -جىلعا قاراي مۇنداي شارالاردى جىلىنا 700 ميلليارد دوللارعا دەيىن قاجەتتى قارجىلاندىرۋدى قامتاماسىز ەتۋگە ۇندەدى.

سونىمەن قاتار، ول تابيعاتقا زيان كەلتىرەتىن سۋبسيديالاردان باس تارتىپ، ولاردى ەكولوگيالىق تازا جوبالارعا باعىتتاۋ قاجەتتىگىن ەسكە سالدى. مۇنىڭ بارلىعىن ماسەلەلەردى شەشۋگە كوپجاقتى كوزقاراسپەن عانا جاساۋعا بولادى.

«الايدا ءبىز بوس ۋادەلەردەن اۋلاق بولعانىمىز ءجون. ءوز مىندەتتەمەلەرىمىزدى ناقتى ارەكەتتەرمەن بەكىتىپ، ولاردى جۇزەگە اسىرۋ ءۇشىن قارجىلاندىرۋدى قامتاماسىز ەتۋىمىز كەرەك»، - دەپ ەسكەرتتى ا. گۋتەرريش.