الەۋمەتتىك ماڭىزى بار ازىق-تۇلىك ونىمدەرىنىڭ باعاسى 3,2 پايىزعا ءوستى - مينيستر

«بيىلدىڭ باسىنان الەۋمەتتىك ماڭىزى بار ازىق- تۇلىك ونىمدەرىنىڭ باعاسى 3,2 پايىزعا ءوستى. بۇل رەتتە، وتكەن جىلدىڭ ۇقساس كەزەڭىندە باعالار 4,8 پايىزعا قىمباتتادى. ءوسىمنىڭ 4,1 پروتسەنتتىك پۋنكتى كارانتيندىك دۇرلىكپە سالدارىنان ناۋرىز ايىندا بايقالدى. قابىلدانعان جەدەل ءىس- شارالاردىڭ ناتيجەسىندە باعالاردىڭ وزگەرۋى تۇراقتاندى. سوڭعى ءۇش اپتادا ءوسىم 0,2 پايىزدى قۇرادى»، - دەدى مينيستر ۇكىمەت وتىرىسىندا.

ونىڭ ايتۋىنشا، باعانىڭ ودان ءارى وسۋىنە جول بەرمەۋ ماقساتىندا بيىلعى 11-ناۋرىزدا ق ر ۇكىمەتىنىڭ وتىرىسىندا 45 ءىس-شارادان قۇرايتىن باعانى تۇراقتاندىرۋ جونىندەگى جول كارتاسى ماقۇلداندى. جول كارتاسىن ورىنداۋ اياسىندا ناۋرىزدا جەدەل شارالار قابىلداندى.

«سونىمەن قاتار، كەيبىر وڭىرلەردە ءالى كۇنگە دەيىن جوعارى ءوسىم بايقالادى. 6 ساۋىردەگى جاعداي بويىنشا ەڭ جوعارعى باعا ءوسىمى جامبىل وبلىسىندا (%4,2) جانە اتىراۋ وبلىسىندا (%3,8) ورىن الدى. ەڭ از 2,9 پايىزعا ءوسىم شىعىس قازاقستان جانە اقمولا وبلىستارىندا تىركەلدى»، - دەدى ب. سۇلتانوۆ.

بۇدان بۇرىن حابارلانعانداي، ق ر پرەمەر-ءمينيسترىنىڭ ءبىرىنشى ورىنباسارى ءاليحان سمايىلوۆ اتىراۋ مەن جامبىل وبلىستارىندا الەۋمەتتىك ماڭىزى بار ازىق-تۇلىك باعاسى قىمباتتاپ كەتكەنىن ايتتى. ءوز كەزەگىندە ۇكىمەت باسشىسى اسقار مامين باعالارىنىڭ وسۋىنە جول بەرگەنى ءۇشىن اتىراۋ جانە جامبىل وبلىستارى اكىمدەرىنىڭ جاۋاپتى ورىنباسارلارىنا قاتاڭ سوگىس جاريالاۋ جونىندەگى ۇسىنىسقا قولداۋ ءبىلدىردى.

اۆتور: رۋسلان عابباسوۆ