قازاقستاندا 3 جىلدا جەمقورلىق ءۇشىن 2,5 مىڭنان استام ادام سوتتالدى
بۇل جايلى قازاقستان رەسپۋبليكاسىنىڭ پرەزيدەنتى ن. نازاربايەۆتىڭ بۇگىن، 2018 -جىلعى 10 -قاڭتاردا جاريالانعان «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىندا ايتىلدى.
«سوڭعى 3 جىلدا عانا جوعارى لاۋازىمدى شەنەۋنىكتەر مەن مەملەكەتتىك كومپانيالاردىڭ باسشىلارىن قوسا العاندا، جەمقورلىق ءۇشىن 2,5 مىڭنان استام ادام سوتتالدى. وسى ۋاقىت ىشىندە ولاردىڭ 17 ميلليارد تەڭگە كولەمىندە كەلتىرگەن زالالى وتەلدى»، - دەلىنگەن جىل سايىنعى جولداۋدا.
مەملەكەت باسشىسىنىڭ ايتۋىنشا، جەمقورلىقتىڭ الدىن الۋعا باعىتتالعان كۇرەستە مەملەكەتتىك ورگاندارداعى پروتسەستەردى، سونىڭ ىشىندە ولاردىڭ حالىقپەن جانە بيزنەسپەن قارىم-قاتىناسىن سيفرلاندىرۋدىڭ ماڭىزى زور. اتاپ ايتقاندا، ازاماتتار ءوز وتىنىشتەرىنىڭ قالاي قاراستىرىلىپ جاتقانىن كورىپ، دەر كەزىندە ساپالى جاۋاپ الۋعا ءتيىس.
سوت جانە قۇقىق قورعاۋ جۇيەلەرىن ينستيتۋتسيونالدى تۇرعىدان وزگەرتۋ جۇزەگە اسىرىلۋدا. زاڭناماعا قىلمىستىق پروتسەستەگى ازاماتتاردىڭ قۇقىقتارىن قورعاۋ ءىسىن كۇشەيتۋدى، ونىڭ اسىرە قاتاڭدىعىن باسەڭدەتۋدى كوزدەيتىن نورمالار ەنگىزىلدى.
ادۆوكاتتاردىڭ قۇقىقتارى مەن سوتقا دەيىنگى ساتىداعى سوت باقىلاۋىنىڭ اياسى كەڭەيدى. قۇقىق قورعاۋ ورگاندارىنىڭ وكىلەتتىگى مەن جاۋاپكەرشىلىك شەگى ايقىندالدى.
«ازاماتتاردىڭ كونستيتۋتسيالىق قۇقىقتارىنا كەپىلدىكتى نىعايتۋ، قۇقىق ۇستەمدىگىن قامتاماسىز ەتۋ، قۇقىق قورعاۋ قىزمەتىن ىزگىلەندىرۋ جۇمىستارىن جالعاستىرۋ قاجەت»، - دەلىنگەن جولداۋدا.
سونداي-اق، ەلباسى قوعامدىق ءتارتىپتى ساقتاۋ جانە قاۋىپسىزدىكتى قامتاماسىز ەتۋ سالاسىندا كوشەلەردە جانە ادام كوپ جينالاتىن قوعامدىق ورىنداردا بەينەباقىلاۋ جۇرگىزەتىن، ازاماتتاردى انىقتايتىن جانە جول قوزعالىسىن قاداعالايتىن ينتەللەكتۋالدى جۇيەلەردى بەلسەندى تۇردە ەنگىزۋدى تاپسىردى.
