رەسەي ميللياردەرلەرى ءبىر كۇندە 3,1 ميلليارد دوللار جوعالتتى
Bloomberg اگەنتتىنىڭ حابارلاۋىنشا، بۇل جاعداي رەسەي پرەزيدەنتى ۆلاديمير پۋتيننىڭ ەكونوميكالىق كەڭەسشىسى اندرەي بەلوۋسوۆ ەلدەگى ەڭ ءىرى مەتاللۋرگيالىق جانە تاۋ-كەن كومپانيالارىنا سالىقتى كوتەرۋدى ۇسىنعان سوڭ بولىپ وتىر.
بەلوۋسوۆ وسىلايشا ۆلاديمير پۋتيننىڭ مامىردا شىعارعان جارلىعىن ىسكە اسىرۋعا 500 ميلليارد رۋبل شىعارىپ الۋعا كەڭەس بەرگەن.
پرەزيدەنتكە جازعان حاتىندا بەلوۋسوۆ بيۋجەتكە كوبىرەك قارجى قۇيا الادى دەگەن 14 كومپانيانى اتاعان. وسىنىڭ سالدارىنان ول كومپانيالار اكسيالارىنىڭ قۇنى تومەندەگەن، ال الەۋەتتى ينۆەستورلار ولاردىڭ كەيبىرىمەن بىرلەسكەن جوبالاردان باس تارتقان.
ميللياردەرلەردىڭ ناقتى ۋاقىت شەگىندە داۋلەتىنىڭ ارتىپ، ءيا كەمىگەنىن باقىلاپ وتىراتىن Bloomberg Billionaires يندەكسى بويىنشا، سالىققا قاتىستى ۇسىنىستان نوۆوليپەتسك مەتاللۋرگيالىق كومبيناتىنىڭ يەسى - ۆلاديمير ليسين ەڭ كوپ زارداپ شەككەن. ول 832 ميلليون دوللار (نەمەسە بايلىعىنىڭ 4 پايىزى) جوعالتقان. ودان كەيىنگى ورىندارداعى ماگنيتوگورسك مەتاللۋرگيالىق كومبيناتىنىڭ يەسى ۆيكتور راشنيكوۆ 446 ميليون دوللار، «سيەۆەرستال» كومپانياسىنىڭ يەسى الەكسەي مورداشوۆ 444 ميلليون دوللار جوعالتقان. گەننادي تيمچەنكو، الىشەر ۋسمانوۆ، رومان ابراموۆيچ جانە ۆلاديمير پوتانين دە قارجىلاي شىعىنعا ۇشىراعان.
ر ب ك اگەنتتىگىنىڭ حابارلاۋىنشا، پۋتين بەلوۋسوۆتىڭ حاتىنا ونىڭ ۇسىنىسىمەن كەلىسەتىنى تۋرالى قول قويىپ بەرگەن. الايدا، كرەملدىڭ باسپا ءسوز حاتشىسى دميتري پەسكوۆ بۇل اقپاراتتى تەرىستەدى.
«ازاتتىق»
