ۆولەيبولدان الەمدىك گران-پري ويىندارى: قازاقستاندىقتار اۆستراليا كومانداسىن 3:0 ەسەبىمەن تىزە بۇكتىردى
تۋرنير شىمىلدىعىن چەحيا مەن حورۆاتيا قۇراما كوماندالارى اشتى. اسا تارتىستى وتكەن ويىندا چەحيالىقتار ويىننىڭ ەكىنشى جارتىسىندا بارىنشا سالقىن قاندىلىقپەن ويناپ، 3:1 ەسەبىمىن جەڭىسكە جەتتى. وسىدان كەيىن الەمدىك گران-پري ويىندارىنىڭ اشىلۋ سالتاناتى ءوتتى. جينالعان كورەرمەندەرگە بۇگىنگى تۋرنيرگە قاتىساتىن كوماندالار مەن ولاردىڭ ويىنشىلارى تانىستىرىلدى.
ايتا كەتەلىك، اتالمىش ۆولەيبول دوداسى الماتىدا سوڭعى ءتورت جىل ىشىندە وسىمەن ءۇشىنشى رەت وتكىزىلىپ وتىر. وعان «س» ديۆيزيونىنىڭ «P» توبىنداعى قازاقستان، چەحيا، حورۆاتيا جانە اۆستراليا كوماندالارى قاتىسۋدا.
اشىلۋ راسىمىنەن كەيىن ۆولەيبول الاڭىنا قازاقستان مەن اۆستراليا كوماندالارى شىقتى. قازاقستاندىق ۆولەيبولشى قىزدار اۆستراليالىق ارىپتەستەرىن 3:0 ەسەبىمەن تىزە بۇكتىردى. ولاردىڭ ويىنىن تاماشالاۋعا كەلگەن الماتى قالاسىنىڭ اكىمى احمەتجان ەسىموۆ قىزدارعا ساتتىلىك تىلەدى.
ءبىرىنشى پارتيادا ەكى كوماندا دا جاقسى ويىن ورنەگىن كورسەتتى. تەڭ دارەجەدە وينادى. وتانداستارىمىز قاتەلىككە بوي الدىرماي، قارسىلاستارىنىڭ وسال تۇستارىن ۇتىمدى پايدالانىپ 25:21 ەسەبىمەن جەڭىسكە جەتتى. ەكىنشى پارتيادا قازاقستاندىقتاردىڭ باسىمدىعى بايقالا باستادى. جانكۇيەرلەردىڭ قولداۋى اسەر ەتكەن بولسا كەرەك، قىزدار ويىننىڭ ءاربىر ساتىندە شەبەر ويناۋعا تىرىستى. ويىن ناتيجەسى ونى ايقىنداپ تا بەردى. ەسەپ 25:16.
ءۇشىنشى پارتيادا دا شابىتتانا ويناعان قازاقستان قۇراما كومانداسى بابىندا ەكەندىگىن تانىتتى. ويىن تىزگىنىن قولدان شىعارماي 25:16 ەسەبىمەن ويىندى اياقتادى. جالپى ەسەپ 3:0.
بۇگىن 26 شىلدە كۇنى تۇستەن كەيىن ساعات 15:00 دە اۆستراليا-چەحيا، ال 18:00-دە قازاقستان-حورۆاتيا كوماندالارى كەزدەسەدى. كىرۋ تەگىن.
اۆتور: جاپپاربەرگەن ايبوتا
