20:29, 26 - شىلدە 2023 | GMT +5
قازاقستان جەرسەرىكتەرىن قولدانۋ مەرزىمىنىڭ ءوتىپ كەتكەنىنە 2 جىلدان استى - مينيسترلىك
استانا. قازاقپارات - ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلدەرى ايەروعارىش كوميتەتىنىڭ ءتوراعاسى باۋبەك ورالماعامبەتوۆتەن «KazEOSat» سپۋتنيكتەرى قاشانعا دەيىن جۇمىس ىستەيتىنىن سۇرادى، دەپ حابارلايدى قازاقپارات ءتىلشىسى.

«KazEOSat-1» جانە «KazEOSat-2» جەرسەرىكتەرىن جاساۋشىلاردىڭ كەپىلدىگى بويىنشا ولار 2021 -جىلعا دەيىن جۇمىس ىستەۋى قاجەت بولعان. دەگەنمەن ءبىزدىڭ ينجەنەرلەر ونى قاراپ، ولاردىڭ قولدانۋ ۋاقىتىن 2023 -جىلدىڭ سوڭىنا دەيىن ۇزارتقان. ءبىزدىڭ بولجامىمىزعا ساي، قازىرگى ۇشىپ جۇرگەن جەرسەرىكتەر 2026-2027 -جىلدارعا دەيىن جۇمىس ىستەۋى كەرەك. الايدا، ولاردى اۋىستىرۋ قاجەت. بۇل وتە ماڭىزدى ماسەلە»، - دەپ جاۋاپ بەردى باۋبەك ورالماعامبەتوۆ.
ونىڭ ايتۋىنشا، «KazEOSat-1» سپۋتنيگىن اۋىستىرۋ بويىنشا قازىر تەحنيكالىق قۇجاتتاما ازىرلەنىپ جاتىر. كەلەر جىلى اتالعان جەرسەرىكتى قۇراستىراتىن كومپانيامەن كەلىسىمگە قول قويۋ جوسپارلانىپ وتىر.