جارتى عاسىردا تابيعاتتىڭ توتەنشە قۇبىلىستارىنىڭ سالدارىنان 2 ميلليون ادام مەرت بولدى
مۇنداي دەرەكتەردى دۇنيەجۇزىلىك مەتەورولوگيا ۇيىمى ۇسىندى.
د م ۇ مالىمەتى بويىنشا، 1970 -جىلدان 2021 -جىلعا دەيىن شامامەن 12000 تابيعات اپاتى بولعان، دەپ حابارلايدى قازاقپارات ب ۇ ۇ جاڭالىقتارىنا سىلتەمە جاساپ.
جاڭا زەرتتەۋدىڭ ناتيجەلەرى كەشە، 22-مامىردا، دۇنيەجۇزىلىك مەتەورولوگيا كونگرەسىنىڭ اشىلۋىندا جاريالاندى. جەنيەۆادا ءوتىپ جاتقان كونگرەسس 2-ماۋسىمعا دەيىن سوزىلادى. وعان قاتىسۋشىلار 2024-2027 -جىلدارعا ارنالعان كليماتتىق جانە گيدرولوگيالىق قۇبىلىستار، توتەنشە اۋا رايىنىڭ الەۋمەتتىك- ەكونوميكالىق سالدارىنا مەملەكەتتەردىڭ تۇراقتىلىعىن دامىتۋ بويىنشا جوسپار قۇرادى.
مەتەورولوگتاردىڭ ايتۋىنشا، كەيىنگى جارتى عاسىردا بارىنەن دە دامۋشى ەلدەر كوبىرەك زارداپ شەككەن - توتەنشە اۋا رايىنان بولعان ءولىمنىڭ 90 پروتسەنتى مەن ەكونوميكالىق شىعىننىڭ 60 پروتسەنتى سولارعا تيەسىلى.
كەيىنگى 50 -جىلدا توتەنشە اۋا رايى مەن كليمات قۇبىلىستارىنان بولعان ءولىمنىڭ ەڭ كوپ بولىگى ازيانىڭ ەنشىسىندە. ول جاقتا ميلليونعا جۋىق ادام، ونىڭ جارتىسىنان كوبى بانگلادەشتە قازا تاپقان.
تابيعات اپاتتارىنان بولعان كەيىنگى جارتى عاسىرداعى 733585 ءولىم افريكادا تىركەلگەن. ونىڭ 95 پروتسەنتىنە قۋاڭشىلىق سەبەپ بولدى.
د م ۇ جەتىلدىرىلگەن ەرتە ەسكەرتۋ جۇيەلەرى مەن قۇتقارۋ وپەراتسيالارىن جۇيەلى باسقارۋ تابيعات اپاتتارىنىڭ سالدارىن جەڭىلدەتۋگە كومەكتەسكەنىن ايتتى. 2020-2021 -جىلدارى كاتاكليزم سالدارىنان بولعان ءولىم كورسەتكىشى وعان دەيىنگى ونجىلدىقپەن سالىستىرعاندا از.
2022 -جىلدىڭ قاراشاسىندا شارم- ەل- شەيحتە بولعان كليماتتى وزگەرتۋ بويىنشا COP27 كونفەرەنتسياسىندا ب ۇ ۇ باس حاتشىسى انتونيۋ گۋتەرريش «بارىنە ەرتە ەسكەرتۋ جۇيەسى» باستاماسىن ىسكە قوستى. ونىڭ ماقساتى - 2027 -جىلدىڭ سوڭىنا قاراي جەر تۇرعىندارىنىڭ ءبارىن وسىنداي جۇيەمەن قورعاۋ.
قازىرگى ۋاقىتتا جەر تۇرعىندارىنىڭ جارتىسى عانا ەرتە ەسكەرتۋ قىزمەتى جۇمىس ىستەيتىن اۋدانداردا تۇرادى. ال شاعىن ارالداعى دامۋشى ەلدەر مەن ەڭ ناشار دامىعان ەلدەر بۇرىنعىداي ءالسىز جاعدايدا تۇر.
