قىرعىز ەلىمەن ساۋدا اينالىمى 2 ميلليارد دوللارعا جەتەدى - ۇكىمەت

الماتى. قازاقپارات - قازاقستان پرەمەر-ءمينيسترى ءاليحان سمايىلوۆ قىرعىزستان مينيسترلەر كابينەتىنىڭ ءتوراعاسى - پرەزيدەنت اكىمشىلىگىنىڭ باسشىسى اقىلبەك جاپاروۆپەن كەلىسسوزدەر جۇرگىزدى.

كەزدەسۋ الماتىدا بولىپ جاتقان «ەۋروپالىق وداق - ورتالىق ازيا» Ⅱ ەكونوميكالىق فورۋمىنىڭ الاڭىندا ءوتتى، دەپ حابارلايدى قازاقپارات.

تاراپتار ساۋدا-لوگيستيكالىق ينفراقۇرىلىمدى دامىتۋ، ينۆەستيتسيالار تارتۋ، اۋىل شارۋاشىلىعى مەن سۋ-ەنەرگەتيكا سالاسىنداعى ىنتىماقتاستىق جانە باسقا دا ءبىرقاتار ماسەلەلەردى تالقىلادى.

ءاليحان سمايىلوۆ قازاقستان مەن قىرعىزستان اراسىندا ءوزارا سىيلاستىق پەن تاتۋ كورشىلىككە نەگىزدەلگەن سەنىمدى قارىم-قاتىناس دامىپ كەلە جاتقانىن اتاپ ءوتتى.

2022-جىلدىڭ قورىتىندىسى بويىنشا ەكىجاقتى تاۋار اينالىمى %7,5 عا ءوسىپ، $1,1 ميللياردتان استى. وڭ ءۇردىس بيىل دا ساقتالىپ وتىر.

«جاقىن ارادا ساۋدا اينالىمىنىڭ كولەمىن $2 ميللياردقا جەتكىزۋ ءۇشىن قاجەتتى شارالار قابىلدانۋدا. بىرلەسكەن ءىس-قيمىلدار ارقاسىندا اتالعان ماقساتقا قول جەتكىزەمىز دەپ سەنەمىن. قازاقستان ۇكىمەتى ەكىجاقتى ىنتىماقتاستىقتى تەرەڭدەتۋگە باعىتتالعان كوپقىرلى ءوزارا ءىس-قيمىلدىڭ بارلىق سالالارى بويىنشا بەلسەندى ديالوگتى جالعاستىرۋعا دايىن»، - دەدى پرەمەر-مينيستر.

ءوز كەزەگىندە اقىلبەك جاپاروۆ ەلدەر اراسىنداعى ەكىجاقتى كۇن تارتىبىندەگى بارلىق ماسەلەلەر ءوزارا تۇسىنىستىك، سەنىم جانە قولداۋ رۋحىندا تالقىلانىپ، شەشىمىن تاۋىپ جاتقانىن اتاپ ءوتتى.

«بۇگىنگى كەزدەسۋىمىز ەكىجاقتى ىنتىماقتاستىقتىڭ كەلەشەگىن تالقىلاۋعا جانە ايقىنداۋعا جاقسى مۇمكىندىك بەرەتىنىنە سەنىمدىمىن»، — دەدى اقىلبەك جاپاروۆ.