استانادا اعزاعا كۇشتى اسەر ەتەتىن پرەپاراتتى زاڭسىز ساتقان 2 ءدارىحانا جابىلدى
استانا قالالىق پوليتسيا دەپارتامەنتىنىڭ ەسىرتكى قىلمىسىنا قارسى ءىس- قيمىل باسقارماسىنىڭ باستىعى رۋستام عازيزوۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«ەسىرتكى قىلمىستارىن انىقتاۋدا ەلوردا تۇرعىندارى بەلسەندىلىك تانىتۋدا. تۇرعىنداردان تۇسكەن اقپارات نەگىزىندە ەسىرتكى زاتتارىن ساتۋمەن اينالىسىپ كەلگەن 52 سايت بۇعاتتالدى. سونىمەن قاتار، قالا اۋماعىنداعى پسيحوتروپتىق زاتتاردى جارنامالايتىن سۋرەتتەر ءوشىرىلدى»، - دەپ ءمالىم ەتتى رۋستام عازيزوۆ.
باسقارما باسشىسى ەلوردالىق ءدارىحانالار ارقىلى كۇشتى اسەر ەتەتىن پرەپاراتتاردىڭ تارالۋى ازايماي تۇرعانىن اتاپ ءوتتى.
«جىل باسىنان بەرى پوليتسيا دەپارتامەنتى مەن مەديتسينالىق جانە فارماتسيەۆتيكالىق باقىلاۋ كوميتەتى بىرلەسىپ، اكىمشىلىك قۇقىق بۇزۋشىلىق كودەكسىنىڭ 426-بابى (فارماتسيەۆتيكالىق قىزمەتتىڭ جانە دارىلىك زاتتار مەن مەديتسينالىق بۇيىمداردىڭ اينالىسى سالاسىنىڭ قاعيدالارىن بۇزۋ) بويىنشا 4 فاكتىنى انىقتادى. 2 فاكتى بويىنشا جەكە كاسىپكەرلەرگە 345000 تەڭگە كولەمىندە ايىپپۇل سالىندى. ال قالعان 2 ءدارىحانا مۇنداي قۇقىق بۇزۋشىلىقتى قايتالاپ جاساعانى ءۇشىن 6 اي مەرزىمگە جابىلدى»، - دەدى رۋستام عازيزوۆ.
سونىمەن قاتار، ول جىل باسىنان بەرى استانا اۋماعىندا 362 ەسىرتكى قىلمىسى تىركەلىپ، 14 كەلى «سينتەتيكا» تاركىلەنگەنىن ايتتى.
