اتىراۋ وبلىسىندا جەمقورلاردان الىنعان قارجىعا 2 مەكتەپ سالىنادى
اتىراۋ وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، وڭىردە جەمقورلاردان الىنعان قارجىعا ءارقايسىسى 600 ورىندىق ەكى مەكتەپتىڭ قۇرىلىسىن اياقتاۋ كوزدەلىپ وتىر. ونىڭ ءبىرى - مۇنايلى شاھارداعى اقجار-2 شاعىناۋدانىندا ورنالاسقان ورتا مەكتەپ. ءبىلىم ورداسىنىڭ قۇرىلىسىنا 2,8 ميلليارد تەڭگە جۇمسالادى، ال ەكىنشى مەكتەپ بىرلىك-2 شاعىناۋدانىندا سالىنادى. بۇل مەكتەپتىڭ قۇرىلىسىن جۇرگىزۋگە 3,2 ميلليارد تەڭگەنى جاراتۋ كوزدەلگەن.
بۇدان بۇرىن اتىراۋ وبلىسىندا بيىل 25 مەكتەپ جاڭارتىلاتىنىن جازعان بولاتىنبىز.
وبلىستىق ءبىلىم باسقارماسى باسشىسىنىڭ ورىنباسارى تىلەكقابىل بايدوشيەۆتىڭ ايتۋىنشا، مەكتەپتەر جاڭا وقۋ جىلى باستالعانعا دەيىن جوندەۋدەن وتەدى.
«اتىراۋ وبلىسىندا 2021 -جىلى قالا مەن اۋدان ورتالىقتارىنداعى، اۋىلدارداعى مەكتەپتەردى قايتا جاڭعىرتۋ قولعا الىندى. بيىل وبلىستا 25 مەكتەپتە قايتا جاڭعىرتۋ جۇمىسى مەملەكەتتىك ساتىپ الۋ پورتالى ارقىلى جۇزەگە اسىرىلادى. بۇل ماقساتقا بيۋدجەتتەن 800 ميلليون تەڭگە ءبولىندى. جوندەۋ جۇمىستارى كەزىندە مەكتەپتەر پاندىك كابينەتتەرمەن، جيھازبەن جاراقتاندىرىلىپ، كىتاپحانالارى مەن اسحانالارى جاڭارتىلادى. ءبىلىم وردالارى قاۋىپسىزدىك جۇيەسىمەن قامتىلىپ، وقۋشىلاردىڭ ينكليۋزيۆتى ءبىلىم الۋىنا مۇمكىندىك جاسالادى. بۇل جۇمىس وقۋشىلار جازعى دەمالىسقا شىققان كەزدە باستالىپ، جاڭا وقۋ جىلىنا دەيىن اياقتاۋ جوسپارلانىپ وتىر»، - دەگەن ەدى تىلەكقابىل بايدوشيەۆ.