قازاق- تاجىك بيزنەسمەندەرى 2 ميلليارد دوللاردىڭ كەلىسىمشارتىنا قول قويادى
بۇل تۋرالى پرەمەر- ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ايتتى، دەپ حابارلايدى قازاقپارات ءتىلشىسى.
«بۇگىن وسى ءىس- شارانىڭ العاشقى بولىگىندە عانا بيزنەسمەن اراسىندا 1 ميلليارد 300 ميلليون دوللاردىڭ كەلىسىمشارتىنا قول قويىلدى. دەگەنمەن، فورۋمنىڭ ەكىنشى بولىگى وتەدى. سوندا جالپى 2 ميلليارد دوللاردىڭ كەلىسىمشارتى راسىمدەلەدى»، - دەدى سەرىك جۇمانعارين بيزنەس فورۋم اياسىندا ب ا ق وكىلدەرىنە بەرگەن سۇحباتىندا.
ونىڭ پايىمىنشا، بۇگىن ءوتىپ جاتقان ءىس- شارا سوڭعى ۋاقىتتاعى ەڭ جەمىستى بيزنەس فورۋم سانالادى.
«بۇگىنگە دەيىن ءبىز كوپتەگەن ەلدىڭ وكىلدەردىڭ ساۋدا- ەكونوميكالىق ميسسيالارىمەن كەزدەستىك. ولاردىڭ ىشىندەگى ەڭ جەمىستىسى وسى ءىس- شارا بولىپ تۇر»، - دەدى ۆيتسە- پرەمەر.
«بيىلدىڭ وزىندە ماۋسىمارالىق كەزەڭدە تاجىكستاننان قازاقستانعا الەۋمەتتىك ماڭىزى بار اگروونىمدەردى جەتكىزۋ تۋرالى ۋاعدالاستىققا قول جەتكىزىلدى. بۇل ءبىزدىڭ ءوزارا ءىس- قيمىلمىزدىڭ شەگى ەمەس ەكەنىنە سەنىمدىمىن. مەنىڭ تاپسىرمام بويىنشا جىل باسىنان بەرى قازاقستاندىق بيزنەس وكىلدەرى بار بىرنەشە دەلەگاتسيا تاجىكستانعا بارىپ ۇلگەردى. تاجىكستانعا جىلى قابىلداعانى ءۇشىن العىس ايتقىم كەلەدى. ءبىز ءوز تاراپىمىزدان كۇنباعىس مايى، بيداي جانە ۇن ەكسپورتىن ارتتىرۋعا دايىنبىز. فورۋم الاڭىندا ءتيىستى كوممەرتسيالىق ۋاعدالاستىقتارعا قول قويىلادى»، - دەدى سەرىك جۇمانعارين.
ونىڭ دەرەگىنشە، ەكى ەلدىڭ تەمىرجول تاسىمالى ارقىلى ەكسپورتتىق- يمپورتتىق جۇكتەردى تاسىمالداۋ كولەمى دە ارتىپ كەلەدى. ماسەلەن، وتكەن جىلى تاسىمال كولەمى 563 مىڭ تونناعا جەتىپ، 2021 -جىلمەن سالىستىرعاندا 90 مىڭ تونناعا ارتتى.
«بۇعان قوسا، اۆتوكولىكپەن تاسىمالداۋ دا 66 پايىزعا ارتىپ، 288 مىڭ تونناعا جەتتى»، - دەدى ۆيتسە- پرەمەر.
