رامازان ايىندا اۋىل جاستارى 2 مۇقتاج وتباسىعا باسپانا سىيلادى

استانا. قازاقپارات - قۇرىق اۋىلىنىڭ جاستارى 2 بىردەي مۇقتاج وتباسىن قۋانتىپ، باسپانا كىلتىن تابىس ەتتى، - دەپ حابارلايدى Massaget.kz ءتىلشىسى.

ماڭعىستاۋدا ءبىرى ءۇي جالداپ، ەكىنشىسى اياداي لاشىقتا تۇرىپ جاتقان 2 وتباسى باسپانالى بولدى. ولارعا اۋىل جاستارى پاتەر كىلتىن تابىستادى.

باسپانالى بولعانداردىڭ ءبىرى - جالعىز باستى انا شىنار تاجىبايەۆا. ول جولداسى دۇنيەدەن وزعان سوڭ، 6 بالاسىن جالعىز ءوزى باعىپ كەلەدى. كوپ بالالى وتباسى بۇعان دەيىن اياداي لاشىقتا تۇرىپ كەلگەن. قۇرىق اۋىلىنىڭ جاستارى جانۇيانىڭ وسى جاعدايىن ەسكەرىپ، ولارعا 4 بولمەلى پاتەر الىپ بەردى.

باسپانالى بولعان ەكىنشى وتباسى دا - كوپ بالالى جانۇيا. جادىرا وتەعاليەۆا 6 بالاسىمەن بىرگە جالدامالى پاتەردە تۇرىپ كەلەدى. تاپقان تايانعانىن سوعان تولەيتىن. ول توسىن سىيدى ەستىگەندە قۋانىشتان جىلاپ جىبەردى.

«قاسيەتتى رامازان ايىندا جاساعان جاقسىلىقتارىڭ وزدەرىنە مىڭ ەسەلەنىپ قايتسىن. وزگە اۋىلدىڭ جاستارى سەندەردەن ۇلگى السىن دەپ تىلەيمىن. قۋانىشىمدا شەك جوق. ءتۇس كورگەندەيمىن»، - دەيدى قۇرىق اۋىلىنىڭ تۇرعىنى شىنار تاجىبايەۆا.

سونداي-اق، جاڭا قونىس يەلەرىنە تۇرمىسقا قاجەتتى تەحنيكالار مەن قارجىلاي كورىمدىك تابىستالدى.