الماتى وبلىسىندا گازعا قوسىلۋ قۇنى 2 ەسە ارزاندادى
بۇگىن ۇكىمەت وتىرىسىندا پرەمەر-مينيستر ءاليحان سمايىلوۆ ءوڭىر باسشىسىنان: «وبلىس حالقىنان گازعا قوسىلۋ قۇنى جوعارى دەگەن شاعىمدار تۇسۋدە. بۇل قاراساي، تالعار، ەڭبكشىقازاق اۋداندارىندا. وسى ماسەلەنى شەشۋ بويىنشا قانداي ءىس-شارالار قابىلدايسىزدار؟»، - دەپ سۇراعان ەدى.
مارات سۇلتانعازيەۆتىڭ ايتۋىنشا، وبلىستاعى 384 ەلدى مەكەننىڭ 294 ى گازداندىرۋعا جاتادى. ونىڭ 147 سى، ياعني 51 پايىزدان استامى گازاندىرىلعان. 1 ميلليون 107 مىڭ ادام نەمەسە 73,5 پايىزى گازعا قول جەتكىزدى.
«مەملەكەتتىك- جەكەشەلىك ارىپتەستىك اياسىندا 2022 -جىلى 2,7 ميلليارد تەڭگەگە 4 جوبا ىسكە اسىرىلدى. وتكەن جىلى جەكە ينۆەستورلاردىڭ ەسەبىنەن جۇرگىزىلگەن قۇرىلىس جۇمىستارىنىڭ ارقاسىندا 129 ەلدى مەكەن گازداندىرىلدى. بۇگىندە قولدانىستاعى زاڭناماعا سايكەس، جەكە كاسىپكەرلىك سۋبەكتىلەرى وندىرەتىن تاۋارلارعا، جۇمىستارعا، كورسەتىلەتىن قىزمەتتەرگە باعانى دەربەس بەلگىلەپ وتىر. ويتكەنى، باعا ۇكىمەت تاراپىنان رەتتەۋگە جاتپايدى. بۇل رەتتە ازاماتتاردى گازعا قوسۋ باعاسىن تومەندەتۋ ماقساتىندا اكىمدىك وبلىس پروكۋراتۋراسىمەن جانە گازعا قوسۋ قىزمەتىن جۇزەگە اسىراتىن ۇيىمدارمەن بىرلەسىپ، گازعا قوسۋ باعاسىن 350 مىڭ تەڭگە شەگىندە بەلگىلەۋ تۋرالى كەلىسسوزدەر جۇرگىزدى. 10 مەكەمە كەلىسىمىن بەردى. ولاردىڭ نارىقتا 35 پايىزعا دەيىن ۇلەسى بار»، - دەدى وبلىس باسشىسى.
وسى رەتتە ۇكىمەت باسشىسى «الماتى وڭىرىندە گازعا قوسىلۋ باعاسىنىڭ 2 ەسەگە ارزاندادى ما؟»، - دەپ ناقتىلاۋ سۇراعىن قويدى.
«ءيا، ارزاندادى دەسەك تە بولادى»، - دەپ جاۋاپ بەردى ءوڭىر باسشىسى.
