بولات اقشولاقوۆ شىعىس ءوڭىردى گازداندىرۋدىڭ 2 نۇسقاسىن اتادى

استانا. قازاقپارات - ەلىمىزدىڭ شىعىس ءوڭىرى رەسەيدەن قۇبىر تارتۋ ارقىلى گازداندىرىلۋى مۇمكىن. بۇل تۋرالى بۇگىن ۇكىمەت وتىرىسىندا ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«شىعىس وڭىرلەردى گازداندىرۋ ءۇشىن مينيسترلىك 2 نۇسقانى قاراستىرۋدا. ءبىرىنشى نۇسقا - «قوستاناي- استانا- پاۆلودار- سەمەي- وسكەمەن» باعىتى بويىنشا گاز قۇبىرىن سالۋ. بۇل قوماقتى قاراجات سالۋدى، سالىنعان ينۆەستيتسيالاردىڭ وتەمدىلىگىن قامتاماسىز ەتۋ ءۇشىن تۇتىنۋشىلارعا گاز تاريفتەرىن ۇلعايتۋدى، سونداي- اق گاز كەن ورىندارىنىڭ جاڭا رەسۋرستارىن يگەرۋگە تارتۋدى تالاپ ەتەدى»، - دەدى بولات اقشولاقوۆ.

ونىڭ اتاپ وتۋىنشە، ەكىنشى نۇسقادا قازاقستان مەن رەسەي اراسىنداعى گاز سالاسىنداعى ىنتىماقتاستىق جونىندەگى جول كارتاسى اياسىندا رەسەي فەدەراتسياسىنان گاز يمپورتتاۋدى كوزدەيدى.

«بۇگىنگى تاڭدا قازاق گاز گازپروممەن بىرلەسىپ، «رەسەي فەدەراتسياسى - قازاقستان رەسپۋبليكاسى - قىتاي حالىق رەسپۋبليكاسى» حالىقارالىق گاز قۇبىرىن سالۋ ماسەلەلەرىن زەردەلەۋ ءۇشىن الدىن الا تەحنيكالىق- ەكونوميكالىق نەگىزدەمە ازىرلەۋ ماسەلەسىن پىسىقتاپ جاتىر»، - دەدى مينيستر.

گازعا قوسىلۋ پروتسەسىن اۆتوماتتاندىرۋ ءۇشىن ەلەكتروندى ساۋدا الاڭى ەنگىزىلەدى.

«بيۋروكراتيادان ارىلتۋ جونىندەگى شارالاردى ىسكە اسىرۋ اياسىندا 2022 -جىلى مينيسترلىك باسەكەلەستىكتى قورعاۋ جانە دامىتۋ اگەنتتىگىمەن، ۇلتتىق ەكونوميكا مينيسترلىگىمەن، قازترانسگاز ايماقپەن بىرلەسىپ، گاز جەلىلەرىنە قوسىلۋ كەزىندەگى كەدەرگىلەردى جويۋ بويىنشا جۇمىس جۇرگىزدى. ماسەلەن، حالىق ءۇشىن قاجەتتى قۇجاتتار سانى ازايتىلدى. گازبەن جابدىقتاۋ جەلىلەرىنە قوسىلۋعا تەحنيكالىق شارتتار العان كەزدە قۇجاتتار سانى 7-دەن 4-كە دەيىن، قۇرىلىس- مونتاجداۋ جۇمىستارى اياقتالعاننان كەيىن 14-تەن 9-عا دەيىن قىسقارتىلدى»، - دەدى ول.

ءمينيستردىڭ اتاپ وتۋىنشە، مۇنان بولەك، گازعا قوسىلۋ پروتسەسىن اۆتوماتتاندىرۋ ماقساتىندا قازترانسگاز ايماق ەلەكتروندى ساۋدا الاڭىن ەنگىزۋ بويىنشا جۇمىس جۇرگىزۋدە. وندا تۇتىنۋشىلار كورسەتىلەتىن قىزمەتتەردىڭ قۇنىن، ولاردىڭ رەيتينگتەرىن نەگىزگە الا وتىرىپ، مونتاجداۋ ۇيىمدارىن، جابدىقتاردى جەتكىزۋشىلەردى تاڭداي الادى.

«قابىلدانعان ءىس- شارالار گاز جەلىلەرىنە قوسىلۋ قارقىنىن ارتتىرۋعا مۇمكىندىك بەرەدى. وسى باعىتتاعى جۇمىس جالعاساتىن بولادى»، - دەدى بولات اقشولاقوۆ.

ەلىمىزدىڭ سولتۇستىگى مەن شىعىسىن گازداندىرۋ بويىنشا تۇپكىلىكتى شەشىم 1- مامىرعا دەيىن قابىلدانۋى ءتيىس. بۇل تۋرالى ۇكىمەت وتىرىسىندا پرەمەر- مينيستر ءاليحان سمايىلوۆ ايتتى.

«ءبىز بارلىق ءوڭىردى گازداندىرۋ قاجەتتىگىن كوپتەن بەرى ايتىپ كەلەمىز. وسىعان بايلانىستى مەملەكەت باسشىسى ەلىمىزدىڭ سولتۇستىك جانە شىعىس وڭىرلەرىن گازداندىرۋدىڭ ءتيىمدى نۇسقاسىن تاڭداۋدى تاپسىردى. بۇل وڭىرلەردىڭ تۇرعىندارى گازدى كوپتەن كۇتىپ ءجۇر. ال، ءبىز قاي نۇسقانى باسشىلىققا الۋىمىز كەرەك؟ بۇل تۋرالى ەنەرگەتيكا مينيسترلىگى مەن QazaqGaz-دا ءالى كۇنگە دەيىن تولىق ناقتى جاۋاپ جوق. بۇل ماسەلەنىڭ نۇكتەسىن قوياتىن ۋاقىت جەتتى»، - دەدى ۇكىمەت باسشىسى.

سوندىقتان، ءاليحان سمايىلوۆ ەنەرگەتيكا مينيسترلىگى «سامۇرىق- قازىنا» قورىمەن بىرلەسىپ، قاراستىرىلىپ وتىرعان نۇسقالار بويىنشا 1-مامىرعا دەيىن تۇپكىلىكتى شەشىم دايىنداۋى قاجەتتىگىن باسا ايتتى.

«سودان كەيىن ونى ەنەرگەتيكالىق كەڭەستىڭ وتىرىسىندا قارايتىن بولامىز»، - دەدى پرەمەر- مينيستر.