قازاقستان جەڭىل اتلەتيكادان ازيا چەمپيوناتىندا 2-ورىن الدى
بۇل تۋرنير ءبىزدىڭ ەلىمىزدىڭ تاريحىندا تۇڭعىش رەت ءوتتى. ءىس-شارا جوعارى دەڭگەيدە ۇيىمداستىرىلدى، ال سپورتشىلار لايىقتى ونەر كورسەتىپ، ەل ءۇمىتىن اقتادى.
قازاقستان قۇراماسىنىڭ قورجىنىنا 12 مەدال ءتۇستى، ونىڭ 6 التىن، 3 كۇمىس جانە 3 قولا، دەپ جازدى بۇگىن ءوزىنىڭ Facebook پاراقشاسىندا ق ر مادەنيەت جانە سپورت ءمينيسترى اسقات ورالوۆ.
ايەلدەر قۇراماسى بيىكتىككە سەكىرۋ بويىنشا جەڭىس تۇعىرىنان كورىندى. جەلاياقتارىمىز دا جوعارى ناتيجەلەرگە قول جەتكىزدى.
4 مەتردەن 400 مەترگە دەيىنگى ەستافەتادا قازاقستاننىڭ ەرلەر جانە ايەلدەر كوماندالارى جەڭىمپاز اتانسا، سول قاشىقتىقتاعى جالعىز ايەلدەر جارىسىندا ەلينا ميحينا ءبىرىنشى كەلدى. دەۆيد ەفرەموۆ بولسا كەدەرگىلەرمەن 60 مەتردى، ال كارولين كيپكيرۋي 3000 مەتردى ءبىرىنشى ەڭسەرىپ ازيا چەمپيونى اتاندى.
سپورتشىلارىمىزدىڭ بۇل جەتىستىكتەرى قازاقستانعا مەدالدىق ەسەپ قورىتىندىسى بويىنشا 2-ورىن بيىگىنەن كورىنۋگە مۇمكىندىك بەردى. 1-ورىندا جاپونيا قۇراماسى، ال كاتار كومانداسى ۇزدىك ۇشتىكتى تۇيىندەدى.
مەن سپورتشىلارىمىز بەن جانكۇيەرلەرىمىزدى لايىقتى ناتيجەمەن قۇتتىقتايمىن. ءدال وسىنداي جارقىن جەڭىستەر جاس سپورتشىلار ءۇشىن كەرەمەت موتيۆاتسيا ءارى ەلىمىزدە جەڭىل اتلەتيكانىڭ دۇرىس باعىتتا كەلە جاتقانىنىڭ كورسەتكىشى دەپ بىلەمىن.
«كەلەسى ازيا چەمپيوناتى تەگەراندا وتەدى. يران بىرىنشىلىگىندە سپورتشىلارىمىزدىڭ ءساتتى ونەر كورسەتۋىن تىلەيمىز»، - دەپ جازدى مينيستر.
فوتو: facebook.com/اسحات ورالوۆ
