قازاقستان وسىمدىك مايى ەكسپورتىن 2 ەسەگە جۋىق ارتتىردى
استانا. قازاقپارات - 2022 -جىلدىڭ قاڭتار- قىركۇيەك ايلارىندا ەلىمىزدە 422,1 مىڭ توننا تازارتىلعان جانە تازارتىلماعان وسىمدىك مايى ءوندىرىلدى. بۇل ءبىر جىل بۇرىنعى كورسەتكىشتەن 25,3 پايىزعا ارتىق، دەپ حابارلايدى قازاقپارات ءتىلشىسى Energyprom پورتالىنا سىلتەمە جاساپ.
وڭىرلەر بويىنشا ەڭ كوپ ءونىم كولەمى ءداستۇرلى تۇردە شىعىس قازاقستان وبلىسىنا تيەسىلى: 181 مىڭ توننا، ءبىر جىلدا 16 پايىزعا ارتقان.
ۇزدىك ۇشتىككە اباي وبلىسى (61,7 مىڭ توننا) جانە شىمكەنت قالاسى (41,6 مىڭ توننا، 29,1 پايىزعا ازايعان) كىردى.
وسى جىلدىڭ قاڭتار- تامىز ايلارىنىڭ قورىتىندىسىندا جەرگىلىكتى كومپانيالار وسىمدىك مايىنا سۇرانىستى (ىشكى نارىقتاعى ساتۋ مەن ەكسپورت) ءبىر جىل بۇرىنعى 78,4 پايىزبەن سالىستىرعاندا 81,2 پايىزعا قامتاماسىز ەتتى.
وسى كەزەڭدە جەرگىلىكتى ءونىم 369,8 مىڭ تونناعا دەيىن 19,3 پايىزعا جىلدىق ءوسىم كورسەتتى. ال يمپورت، كەرىسىنشە، 0,2 پايىزعا ازايىپ، 85,4 مىڭ توننانى قۇرادى.
ماي ەكسپورتى بىردەن 1,9 ەسە ءوسىپ، 201,4 مىڭ تونناعا دەيىن ارتتى. قازاقستاننىڭ ىشكى نارىعىندا وسىمدىك مايىنىڭ بارلىق ءتۇرىن ساتۋ 253,8 مىڭ توننانى قۇرادى.
بۇل ءبىر جىل بۇرىنعىدان 12,6 پايىزعا از.
ال كۇنباعىس مايىنا جەرگىلىكتى كومپانيالار سۇرانىستى ءبىر جىل بۇرىنعى 79,2 پايىزبەن سالىستىرعاندا 82,7 پايىزعا قامتاماسىز ەتتى.
قىركۇيەكتە وسىمدىك مايىنىڭ باعاسى ءبىر جىل ىشىندە 16,6 پايىزعا ءوستى. ونىڭ ىشىندە كۇنباعىس مايى جىلدىق ديناميكا بويىنشا 16,4, ال ءزايتۇن مايى 22 پايىزعا قىمباتتادى.
وسىمدىك مايى باعاسىنىڭ ەڭ جوعارى ءوسىمىن ماڭعىستاۋ وبلىسىنىڭ تۇرعىندارى سەزىندى: ءبىر جىلدا 23,9 پايىز.
ودان كەيىن الماتى وبلىسى (23,8 پايىزعا ءوستى) مەن الماتى قالاسى (23,4%) تۇر. ەڭ از جىلدىق ءوسىم ەلوردادا تىركەلدى: 7,1 پايىز.
اۆتور
مارلان جيەمباي
