ۇلى بريتانيادا مايمىل شەشەگىن جۇقتىرعاندار سانى 2 مىڭنان استى
ەل بويىنشا اۋرۋ جۇقتىرۋشىلار سانى 2130 ادامعا جەتتى، ولاردىڭ كوپشىلىگى - لوندوندا، دەپ حابارلايدى قازاقپارات ABC News باسىلىمىنا سىلتەمە جاساپ.
بريتاندىق دەنساۋلىق ساقتاۋ اگەنتتىگى ىندەت تارالىپ جاتقانىن ايتتى. اۋرۋدى كوبىنە ءداستۇرلى ەمەس جىنىستىق باعىتتاعى ەر ادامدار جۇقتىرعان. تەك مايمىل شەشەگىن جۇقتىرعان ناۋقاستاردى ەمدەيتىن مەديتسينا قىزمەتكەرلەرى جانە اۋرۋعا شالدىققاندارمەن بايلانىستا بولعان ادامدارعا عانا ۆاكسينا سالىناتىن. ۇلى بريتانيا بيلىگى سونىمەن قاتار جوعارىدا اتالعان ەرلەردىڭ جەكە ساناتىنا دا ۆاكسيناتسيانى ۇسىنىپ، ەكپە ستراتەگياسىن كەڭەيتتى.
اگەنتتىك وسى ايدا ۆاكسينانىڭ العاشقى قوسىمشا دوزالارى كەلەدى، ال قالعانى قىركۇيەك ايىندا جەتكىزىلەدى دەپ مالىمدەدى. Bavarian Nordic كومپانياسى شىعارعان ۆاكسينا شەشەك اۋرۋىن ەمدەۋگە ارنالعان. ونىڭ مايمىل شەشەگىنە قارسى تيىمدىلىگى - شامامەن %85. بۇعان دەيىن ۆاشينگتوندا مايمىل شەشەگى ءورشىپ بارا جاتقانى حابارلانعان بولاتىن.
