ۇرلانعان قارۋدىڭ 2 مىڭنان استامى قىلمىسكەرلەردىڭ قولىندا - باس پروكۋراتۋرا
بۇل تۋرالى ق ر باس پروكۋراتۋراسى قىلمىستىق قۋدالاۋ قىزمەتى باسشىسىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى قازاقپارات ءتىلشىسى.
«ۇرلانعان اتىس قارۋلارىن انىقتاۋ جۇمىستارى بەلسەندى جۇرگىزىلىپ جاتىر. شىمكەنت قالاسىندا ۇلتتىق قاۋىپسىزدىك كوميتەتى ورگاندارى ىشكى ىستەر مينيسترلىگىمەن بىرلەسىپ، جەدەل-ىزدەستىرۋ ءىس-شارالارىن جۇرگىزدى. وسى ورايدا تۇركىستان وبلىسىنىڭ 2 تۇرعىنى ۇستالدى. ولاردان «كامەراد» اڭشىلىق دۇكەنىنەن ۇرلانعان ەكى «سايگا-12» كارابينى مەن پنيەۆماتيكالىق مىلتىق تابىلدى»، - دەدى ەلدوس قيلىمجانوۆ ورتالىق كوممۋنيكاتسيالار قىزمەتىندە.
سونىمەن قاتار ول تارازدا قارۋ ساقتالعان «قويما» تابىلعانىن ايتتى. ودان جامبىل وبلىسى پوليتسيا دەپارتامەنتىنەن ۇرلانعان 1 «كالاشنيكوۆ» اۆتوماتى، 2 «ماكاروۆ» تاپانشاسى، «SHTURM» شابۋىل مىلتىعى، 1 گراناتا جانە وق-دارىلەر تاركىلەندى.
«جالپى، ەل بويىنشا قۇقىق قورعاۋ ورگاندارى قاڭتار وقيعالارى كەزەڭىندە ۇرلانعان 846 ويىق جانە تەگىس ۇڭعىلى قارۋدى تاپتى. ۇرلانعان قارۋدىڭ 2 مىڭنان استامى ءالى دە قىلمىسكەرلەردىڭ قولىندا ەكەنىن، بۇل ءوز كەزەگىندە قاۋىپ توندىرەتىنىن اتاپ وتكەن ءجون. وسى رەتتە زاڭسىز ساقتالعان قارۋدى، وق-دارىلەردى جانە جارىلعىش زاتتاردى ءوز ەركىمەن تاپسىرعان ادامدار قىلمىستىق جاۋاپتىلىقتان بوساتىلادى. دەگەنمەن، ولاردىڭ ارەكەتتەرىندە وزگە دە قىلمىس قۇرامى بولماۋى ءتيىس. ال ادامدى قۇقىق قورعاۋ ورگاندارى قارۋمەن ۇستاپ العان جاعدايلار ەرىكتى تۇردە تاپسىرۋ دەپ تانىلمايدى»، - دەدى باس پروكۋراتۋرا وكىلى.
بۇدان بۇرىن حابارلانعانداي، قازىرگى كەزدە ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 53 جانە تەرروريزم اكتىلەرىنە قاتىستى 32 قىلمىستىق ءىس بار.
مەملەكەتتىك وبەكتىلەردى ورتتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى بولدى.
