باس جۇلدە - 2 ميلليون تەڭگە: پاۆلوداردا قالا كۇنىنە وراي بايگە ءوتتى
ۇلتتىق سپورت تۇرلەرىنەن جارىستار «قۇلاگەر» يپپودرومىندا ۇيىمداستىرىلدى. پاۆلودار قالاسىنىڭ دەنە شىنىقتىرۋ جانە سپورت ءبولىمىنىڭ باسشىسى اسەت ابىلتايەۆتىڭ ايتۋىنشا، جارىستىڭ اقتىق مارەسى 16-شىلدەدە ءوتتى. ويىن ەكىباستۇز كومانداسىنىڭ جەڭىسىمەن اياقتالدى. كوكپاردان باسقا، بايگە، قازاق كۇرەسىنەن تۋرنير ۇيىمداستىرىلدى.
«بايگەگە نۇر- سۇلتان، اتىراۋ، وسكەمەن، پاۆلوداردان اسىل تۇقىمدى جىلقىلار اكەلىندى. قۇنان بايگە جارىسىنىڭ جەڭىمپازىنا - ميلليون تەڭگە، تاي بايگەگە - موتوتسيكل، توپ بايگەگە - 1,5 ميلليون، جورعا جارىسىنا - 500 مىڭ تەڭگە، الامان بايگەگە 2 ميلليون تەڭگە ۇتىس تىگىلدى. قازاق كۇرەسى بويىنشا بالۋانداردىڭ جۇلدە قورى - ميلليون تەڭگە»، - دەدى ۇيىمداستىرۋشىلار.
مۇنداي كولەمدەگى ءىس- شارا پاۆلوداردا ەكىنشى رەت وتكىزىلىپ وتىر. وبلىس ورتالىعىنا جارىستا باق سىناۋ ءۇشىن 50 دەن استام قاتىسۋشى كەلدى. كەلەسى تۋرنير قىركۇيەك ايىندا وتەدى.
