ۇلتتىق قوردىڭ ۆاليۋتالىق اكتيۆتەرىنىڭ كولەمى 2 ميلليارد دوللارعا ازايدى
بۇل تۋرالى ۇلتتىق بانك ءتوراعاسىنىڭ ورىنباسارى ءاليا مولدابەكوۆا ءمالىم ەتتى، دەپ حابارلايدى قازاقپارات ءتىلشىسى.
«الدىن الا دەرەكتەرگە سايكەس، ماۋسىمنىڭ قورىتىندىسى بويىنشا ۇلتتىق قوردىڭ ۆاليۋتالىق اكتيۆتەرىنىڭ كولەمى وتكەن ايدا 2 ميلليارد ا ق ش دوللارىنا تومەندەپ، 51,9 ميلليارد ا ق ش دوللارىن قۇرادى»، - دەيدى ءاليا مولدابەكوۆا.
ونىڭ ايتۋىنشا، ۇلتتىق قور اكتيۆتەرىنىڭ تومەندەۋى اكسيالار باعاسىنىڭ ايتارلىقتاي قۇلدىراۋىنا جانە ا ق ش دوللارىنىڭ نىعايۋىنا بايلانىستى بولدى. ۇلتتىق قوردىڭ تومەندەۋىنە ۇلتتىق قوردان رەسپۋبليكالىق بيۋدجەتكە ترانسفەرتتەر ءبولۋ دە اسەر ەتتى.
«سونىمەن قاتار، ماۋسىم ايىندا ترانسفەرتتەر كولەمى 578 ميلليارد تەڭگە بولدى. ترانسفەرتتەردىڭ باسىم بولىگى ۇلتتىق قوردىڭ تەڭگەدەگى شوتىنداعى قالدىقتار، سونداي- اق قورعا تەڭگەدەگى تۇسىمدەر ەسەبىنەن ءبولىندى. سونداي- اق ىشكى ۆاليۋتا نارىعىندا 438 ميلليون ا ق ش دوللارىنا اكتيۆتەر ساتىلدى، بۇل - 199 ميلليارد تەڭگەگە بالاما سوما. ۇلتتىق قوردان ساتۋ ۇلەسى قازاقستان قور بيرجاسىنداعى ۆاليۋتالىق ساۋدا- ساتتىقتىڭ جالپى كولەمىنىڭ %20,7 ىن قۇرادى»، - دەيدى بانك وكىلى.
ۇلتتىق بانك ءتوراعاسىنىڭ ورىنباسارى ينفلياتسيانىڭ جەدەلدەۋىمەن كۇرەستە ورتالىق بانكتەر سوڭعى 20 جىلدا مولشەرلەمەلەردى اۋقىمدى كوتەرۋگە كوشكەنىن اتاپ ءوتتى.
«جوعارى گەوساياسي تاۋەكەلدەر مەن فەدەرالدى رەزەرۆتىك جۇيەنىڭ (ف ر ج) ينفلياتسيانى تومەندەتۋ ءۇشىن بارىنشا اگرەسسيۆتى ارەكەت ەتۋگە دايىن ەكەندىگىن مالىمدەۋى اياسىندا وتكەن ايدىڭ قورىتىندىسى بويىنشا اكتسيالار نارىعىنىڭ ايتارلىقتاي تومەندەۋى بايقالادى. بۇل رەتتە ۇلتتىق قوردىڭ ۇزاق مەرزىمدى كىرىستىلىگى قۇرىلعاننان باستاپ جىلدىق ماندە %3,05 بولدى»، - دەپ ءتۇسىندىردى ۇلتتىق بانك ءتوراعاسىنىڭ ورىنباسارى ءاليا مولدابەكوۆا.
