قامبادا 2 جارىم جىلعا جەتەتىن ۇننىڭ استىعى بار - ەربول قاراشوكەيەۆ
«الەمدە بولىپ جاتقان جاعدايعا بايلانىستى ۇن ەكسپورتىنا تولىق تىيىم سالماساق، ءوزىمىز ءونىمسىز قالامىز دەپ جۇرگەندەر بار. ولاردىڭ ايتۋىنشا، قازاقستان قولداعى ۇننىڭ ءبارىن ساتىپ جىبەرگەن»، - دەدى ب ا ق وكىلى مينيسترگە.
«بىزدە قازاقستانعا جارتى جىلعا جەتەتىن ۇن بار. ونىڭ ۇستىنە استىق تا بار. قاجەت بولسا، ۇنعا اينالدىرا الامىز. قاراپايىم عانا مىسال كەلتىرەيىن.
«ازىق- تۇلىك كروپوراتسياسىنىڭ» قامباسىندا 800 مىڭ توننا استىق بار. ونى ۇنعا اينالدىرساق، قازاقستانعا قاجەت ۇننىڭ 2 جارىم جىلدىق قورىن الۋعا بولادى. سوندىقتان قايتا وڭدەۋشىلەردى ساباسىنا تۇسىرگىم كەلەدى. ەگەر ولار قانداي دا ءبىر سەبەپپەن بۇل بيزنەسپەن اينالىسقىسى كەلمەسە، بۇل الاڭعا كەز كەلگەن ساتتە «ازىق- تۇلىك كورپوراتسياسى» كەلە الادى. وزىندەگى استىقتى قايتا وڭدەپ، قازاقستان نارىعىنا ۇن جەتكىزەدى. ءبىراق بۇل دۇرىس بولمايدى دەپ ويلايمىن. ويتكەنى، مۇنداي ىسپەن بيزنەس اينالىسۋى كەرەك»، - دەدى ۆەدومستۆو باسشىسى.
سونداي- اق، ول مينيسترلىك تاراپىنان استىق ەكسپورتتاۋشىلارعا قانداي ۇسىنىس ايتىلعانىن ءمالىم ەتتى.
«قازىر بيداي وندىرۋشىلەر باعانىڭ وسكەنىن كۇتىپ وتىرعانىن تۇسىنەمىز. سوندىقتان ولار نەگىزگى كولەمدى وزدەرىندە ۇستاپ وتىر. باعا ءارى قاراي وسە تۇسەدى دەپ ويلايدى. وسىعان بايلانىستى، تەڭگەرىمدى ساقتاۋ ءۇشىن 15- ماۋسىمعا دەيىن استىقشىلار قازاقستاننان 1 ميلليون تونناعا دەيىن استىق شىعارا الادى دەپ وتىرمىز. ءبىراق، سونىڭ اياسىندا وسى كولەمنىڭ 10 پايىزىن، ياعني 100 مىڭ توننا استىقتى قازاقستان نارىعىنا ارزان باعامەن وتكىزۋلەرى كەرەك. ءبىز وسىلاي ۇسىندىق. ءدال وسىنداي ۇسىنىستى ۇن وندىرۋشىلەرگە دە ايتىپ وتىرمىز. ولار 15- ماۋسىمعا دەيىن 300 مىڭ تونناعا دەيىن عانا ۇن شىعارۋى كەرەك. سول شىعارعان ءونىمنىڭ 10 پايىزى كولەمىندە ىشكى نارىققا ارزان باعامەن ساتۋى كەرەك. بۇل استىق ەكسپورتتاۋشىلاردىڭ دا، ۇن ەكسپورتتاۋشىلاردىڭ دا قۇقىعىن بۇزبايدى»، - دەدى ەربول قاراشوكەيەۆ.
ايتۋىنشا، ۇسىنىلىپ وتىرعان كۆوتا مولشەرى جىلداعى ەكسپورت كولەمىنەن از ەمەس. «سوڭعى 5 جىلدا ناۋرىز، ءساۋىر، ماۋسىم ايلارىندا قازاقستاننان 100-120 مىڭ توننا ۇن شىعارىلىپ تۇرعان. بۇل ءبىز بەلگىلەپ وتىرعان 300 مىڭ توننا كۆوتا ەكسپورتتاۋشىلارعا تولىعىمەن جەتكىلىكتى دەگەن ءسوز. استىق بويىنشا دا سولاي. ورتا ەسەپپەن ايىنا 500 مىڭ توننا استىق شىعارىلىپ كەلگەن»، - دەدى مينيستر.
اۆتور: ەسىمجان ناقتىباي
