14:39, 22 - اقپان 2022 | GMT +5
بۇرىنعى قورعانىس ءمينيسترى بەكتانوۆ 2 ايعا قاماۋعا الىندى
نۇر-سۇلتان. قازاقپارات – نۇر-سۇلتان سوتى قازاقستاننىڭ بۇرىنعى قورعانىس ءمينيسترى مۇرات بەكتانوۆتى قاماۋعا الۋ تۋرالى ۇكىم شىعاردى.
«2022 -جىلدىڭ 22-اقپانىندا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى مۇرات بەكتانوۆقا قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكسيالادى»، - دەلىنگەن سوت حابارلاماسىندا.
سوتالدى تەرگەپ-تەكسەرۋدىڭ باسقا دەرەكتەرى قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتۋگە جاتپايتىنى ايتىلدى.
بۇعان دەيىن بۇرىنعى قورعانىس ءمينيسترى مۇرات بەكتانوۆ ۋاقىتشا ۇستاۋ يزولياتورىنا قامالعانى حابارلانعان بولاتىن.
ايتا كەتەيىك، پرەزيدەنت 19-قاڭتاردا بەكتانوۆتى سىنعا الىپ، قىزمەتىنەن بوساتقان بولاتىن. توقايەۆتىڭ ايتۋىنشا، مۇرات بەكتانوۆ قازاقستانداعى تارتىپسىزدىكتەر كەزەڭىندە كوماندير رەتىندە قابىلەتىن كورسەتە الماعان.
