قازاقپارات كۇنتىزبەسى: 2- قاڭتار

ەستە قالار وقيعالار

1968-جىلى «ۆەچەرنيي الماتى» قالالىق گازەتىنىڭ العاشقى سانى جارىق كوردى. باسىلىم قالا اكىمشىلىگى مەن ءماسليحاتىنىڭ، قوعامدىق جانە مادەني ۇيىمدارىنىڭ تۇرمىسىنداعى جاڭالىقتاردى، كاسىپكەرلىك، ىسكەرلىك، ساۋدا جانە كولىك سالاسىنداعى اقپاراتتاردى جاريالاپ تۇرادى.

1988-جىلدىڭ 1- ماۋسىمىنان قازاق تىلىندەگى نۇسقاسى - «الماتى اقشامى» جارىق كورە باستادى.

1992 -جىلى قازاقستان رەسپۋبليكاسىنىڭ ينجەنەرلىك اكادەمياسى قۇرىلدى. ونىڭ پرەزيدەنتى بولىپ قوعام جانە مەملەكەت قايراتكەرى، تەحنيكا عىلىمىنىڭ دوكتورى، پروفەسسور، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، قازاقستاننىڭ ەڭبەك سىڭىرگەن عىلىم قايراتكەرى ومىربەك جولداسبەكوۆ سايلاندى.

1992 -جىلى نورۆەگيا كورولدىگى قازاقستان رەسپۋبليكاسىنىڭ تاۋەلسىزدىگىن مويىندادى.

1992 -جىلى قازاقستان رەسپۋبليكاسى ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە بولدى.

2007 -جىلى قازاقستان رامسار كونۆەنتسياسىنا قول قويعان 154-ەل بولدى. قۇجاتقا 2007-جىلدىڭ 2- قاڭتارىندا قول قويىلدى. قول قويىلعان كۇننەن باستاپ ءتورت ايدان كەيىن 2- مامىردا كۇشىنە ەندى.

قازاقستانداعى ءبىرىنشى رامسارلىق نىسان، اقمولا وبلىسىنىڭ تەڭىز-قورعالجىن كولدەر جۇيەسى، 1976-جىلى حالىقارالىق ماڭىزعا يە سۋلى-باتپاقتى القاپتاردىڭ تىزىمىنە ەندى.

2011 -جىلى قازاقستان ت م د ەلدەرىنىڭ ىشىندە العاش رەت ەۋروپا ونكولوگتار مەكتەبىنىڭ ستراتەگيالىق سەرىكتەسى بولدى. ە و م قۇرلىقتىڭ وسى سالاداعى بارلىق كاسىبي مەكتەپتەرىن بىرىكتىرەدى.

2015 -جىلى ەستونيانىڭ استاناداعى ەلشىلىگى ناتونىڭ قازاقستانداعى بايلانىس ەلشىلىگىنە اينالدى. ونىڭ باستى مىندەتى - ناتو قىزمەتى جانە ماقساتتارىمەن تانىس، سونداي-اق ەلدەگى بايلانىستاردى نىعايتۋ.

ەستونيا ەلشىلىگىنىڭ ناتو بايلانىس ەلشىلىگى رەتىندە قىزمەت جۇرگىزۋى سولتۇستىك اتلانتيكالىق اليانستىڭ ەلىمىزگە دەگەن سەنىمىن ايعاقتاپ، ونىڭ بايلانىس ارنالارىن كەڭەيتە تۇسەدى.

2015 -جىلى ەۋرازيا ەكونوميكالىق وداعىنىڭ سايتى www.eaeunion.org مەكەنجاي بويىنشا ىسكە قوسىلدى. سايت وداقتىڭ بارلىق قاتىسۋشى ەلدەردىڭ ۇلتتىق انا تىلدەرىندە - ارميان، بەلورۋس، قازاق جانە ورىس تىلدەرىندە قول جەتىمدى. سونداي-اق سايتتىڭ اعىلشىن تىلىندەگى نۇسقاسى دا بار.

سايتتا ە ە و قاتىسۋشى ەلدەر ارمەنيا، بەلارۋس، قازاقستان جانە رەسەي تۋرالى اقپاراتتار جينالعان. سونىمەن قاتار ۇلتتىق ەكونوميكانىڭ باسىمدىلىعى تۋرالى مالىمەتتەر جاريالانعان.

2020-جىلى قوستاناي وبلىسى قوستاناي اۋدانىنىڭ زاتوبول كەنتى اۋداندىق ماڭىزى بار قالالار ساناتىنا جاتقىزىلدى جانە توبىل قالاسى بولىپ اتاۋى وزگەرتىلدى.

2021 -جىلى قازاقستان پرەزيدەنتى قازاقستان رەسپۋبليكاسىنىڭ ەكولوگيا كودەكسىنە قول قويدى. ول ادام مەن تابيعات اراسىنداعى قوعامدىق قاتىناستاردى رەتتەپ وتىرادى.

قازاقستان رەسپۋبليكاسى ەكولوگيالىق زاڭناماسىنىڭ ماقساتى - رەسپۋبليكاداعى ءبىرىڭعاي مەملەكەتتىك ەكولوگيالىق ساياساتتى ىسكە اسىرۋدىڭ قۇقىقتىق نەگىزدەرىن، مىندەتتەرى مەن قاعيدالارىن، سونداي-اق تەتىكتەرىن ايقىنداۋ.