تۇركيادا باسىلعان 2 مىڭ كىتاپ الماتىلىق وقىرماندارعا تارتۋ ەتىلدى

نۇر-سۇلتان. قازاقپارات - بۇگىن الماتىدا قازاقتىڭ كلاسسيك اقىن-جازۋشىلارىنىڭ تۇركيادا باسىپ شىعارىلعان كىتاپ-البومدارىنىڭ قالا كىتاپحانالارىنا تابىستاۋ ءراسىمى ءوتتى، دەپ حابارلايدى قازاقپارات ءتىلشىسى.

ءىس-شارا بارىسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي حالىقارالىق «تۇركسوي» ۇيىمى شىعارعان قازاقتىڭ كلاسسيك اقىن-جازۋشىلارىنىڭ 24 كىتاپ- البومىنىڭ 2000 عا جۋىق داناسى الماتى قالاسىنىڭ كىتاپحانالارىنا تارتۋ ەتىلدى.

ونىڭ ىشىندە ءۇش تىلدە جاريالانعان «اباي»، «ءۇش ارىس»، «ولجاس سۇلەيمەنوۆ»، «شىڭعىس ايتماتوۆ»، «قالام مەن قاعازدىڭ ماحابباتى» سىندى كىتاپتار بار.

«تۇركسوي ۇيىمىنىڭ باس حاتشىسى دۇيسەن قاسەيىنوۆتىڭ باستاماسىمەن وسىنداي باستامانى قولعا الدىق. بۇل تەك الماتى قالاسىندا عانا ەمەس ەلىمىزدىڭ وزگە دە وڭىرلەرىندە جالعاسىن تابادى. الداعى جوسپارىمىزدا قاراعاندى قالاسى بار»، - دەدى ەلىمىزدىڭ تۇركسويداعى وكىلى باقىتجان ومار.

ايتا كەتەيىك، الماتىدا وتكەن ءىس-شاراعا «تۇركسوي» ۇيىمىنداعى قازاقستان رەسپۋبليكاسىنىڭ وكىلدەرى جانە ەلىمىزدىڭ شىعارماشىلىق زيالى قاۋىمى قاتىستى.