قاراجاتتى ءتيىمدى جۇمساۋدىڭ 2 ءادىسى
وتباسىلىق جانە جەكە بيۋدجەت كىرىستەر مەن شىعىندار قۇرىلىمىنان تۇرادى. بۇل قۇرىلىم ادامنىڭ ايىنا قانشا قاراجات تاباتىنى جانە جۇمسايتىنى جايلى تۇسىنىك بەرەدى. كوپشىلىك ادام ايىنا قانشا قاراجات تاباتىنىن بىردەن ايتا العانىمەن، شىعىنعا كەلگەندە اقشانىڭ قايدا كەتكەنىن ءوزى دە تۇسىنبەيدى. شىعىندار مىندەتتى جانە مىندەتتى ەمەس دەپ ەكىگە بولىنەدى. مىندەتتى شىعىندارعا كوممۋنالدى قىزمەتتەر، ازىق- تۇلىك، ۇيىرمەلەر، بەنزين جانە سپورتپەن اينالىسۋدى جاتقىزساق، مىندەتتى ەمەس شىعىندار دەپ ءار سايىن قايتالانبايتىن، ءبىراق اياق استىنان كەرەك بولىپ قالاتىن زاتتاردى (ءدارى، كيىم جانە ت. ب) ايتادى.
كىرىستەر مەن شىعىنداردى جازىپ ءجۇرۋ ۇزاقمەرزىمدى ماقساتتاردى قالىپتاستىرۋعا مۇمكىندىك بەرەدى. مىسالى، كوپ بولمەلى ءۇي العىڭىز كەلۋى مۇمكىن. ول ءۇشىن جوسپار قۇرىپ، بيۋدجەتتىك كۇندەلىك باستاۋ كەرەك. ءبىر ايعا قويىلعان جوسپار بۇزىلماۋ كەرەك.
بيۋدجەتتى جازىپ ءجۇرۋدىڭ قانداي پايداسى بار؟ كۇندەلىككە قاراپ شىعىنداردى زەرتتەي الاسىز: قايسىسىنا كوپ شىعىن كەتىپ تۇرعانىن، قايسىسىن ازايتسا بولاتىنىن كورە الاسىز. كوبىرەك اقشا تابۋدىڭ جولدارىن ويلاي باستايسىز.
قاراجاتتى ءتيىمدى جۇمساۋعا كومەكتەسەتىن ەكى ءادىستى ۇسىنامىز:
4 كونۆەرت ءادىسى. بۇل ءادىستىڭ باستى ارتىقشىلىعى - ءار شىعىندى جازىپ وتىرۋدىڭ قاجەتى جوق. بۇل ءادىس بويىنشا، الدىمەن تابىسىڭىزدىڭ %10 ىن جيناققا الىپ قويىڭىز. قالعان سومادان بارلىق تۇراقتى تولەمدەرىڭىزدى شەگەرىڭىز. سودان سوڭ قالعان قاراجاتتى 4 اپتاعا (1 اي) تەڭ ءبولىپ، 4 كونۆەرتكە سالىپ قويىڭىز. نەگىزگى ەرەجە -وزىڭىزگە ءبىر اپتاعا الىپ قويعان اقشانى جەتكىزىپ، كەلەسى كونۆەرتتى اشىپ قويماۋ.
50/30/20 ءادىسى. بارلىق كىرىستى مىنا كاتەگوريالار بويىنشا ءبولىڭىز: %50 مىندەتتى شىعىندارعا (تاماق، كوممۋنالدى تولەمدەر جانە باسقا دا شىعىندار)، %30 دەمالۋعا (كافە، كينو جانە ت. ب شىعىندار) جانە %20 جيناققا قالدىرىڭىز.
