باۋىرجان بايبەك: پەداگوگتەردىڭ ەڭبەكاقىسى 2 ەسە كوبەيەدى

شىمكەنت. قازاقپارات - پارتيانىڭ سايلاۋالدى ۋادەلەرىن ىسكە اسىرۋ اياسىندا پەداگوگتەردىڭ ەڭبەكاقىسى ورتاشا العاندا 330 مىڭ تەڭگەدەن اسادى. بۇل تۋرالى شىمكەنت قالاسىنا ساپارى بارىسىندا «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ايتتى، دەپ حابارلايدى قازاقپارات.

ب. بايبەك ساياسي كەڭەستىڭ كەڭەيتىلگەن وتىرىسى قارساڭىندا ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا وڭىرلەرگە ساپارىن جالعاستىرۋدا. بۇگىن ول «Nur Otan» - نىڭ سايلاۋالدى باعدارلامالارىنىڭ شىمكەنت قالاسىندا ورىندالۋ بارىسىمەن تانىستى.

فيليال ءتوراعاسى، شىمكەنت اكىمى مۇرات ايتەنوۆتىڭ مالىمدەۋىنشە، 9 ايدا 2025 -جىلعا دەيىن جوسپارلانعان 475 ينديكاتوردىڭ % 23 ورىندالعان. قالادا 398 مىڭ شارشى مەتر تۇرعىن ءۇي، 5 مەديتسينالىق مەكەمە مەن 115 سپورت الاڭى پايدالانۋعا بەرىلگەن. 250 مىڭ ادامدى ۇزدىكسىز ەلەكتر قۋاتىمەن قامتاماسىز ەتۋ ماقساتىندا «بوزارىق» ەلەكتر قوسالقى ستانسياسى سالىنعان. گاز تاراتۋ ستانسياسىنىڭ قۇرىلىسى اياقتالۋدا، ول 5 شالعاي ەلدى مەكەندى تابيعي گازبەن قامتاماسىز ەتەتىن بولادى. 14 مىڭنان استام جاڭا جۇمىس ورنى اشىلدى.

«مەملەكەت باسشىسى جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى اياسىندا ءبىلىم بەرۋ سالاسىنا ەرەكشە نازار اۋدارىلادى. ەل كولەمىندە 800 جاڭا مەكتەپ سالۋ جانە قولدانىستاعى 5 مىڭ مەكتەپتى جاڭعىرتۋ جوسپارلانعان. تىكەلەي شىمكەنتتە تاياۋداعى 5 جىلدا 66 مەكتەپ سالۋ جانە جوندەۋ جوسپارلانعان، بۇل رەتتە 25 وقۋ ورنى بيىل سالىندى. ساپار بارىسىندا №79 جاڭا مەكتەپتە پەداگوگتەر ۇجىمىمەن كەزدەستىم. مەملەكەت باسشىسىنىڭ تاپسىرماسىمەن بيىل مۇعالىمدەردىڭ جالاقىسى % 25 ءوستى. پارتيانىڭ سايلاۋالدى ۋادەلەرىن ىسكە اسىرۋ اياسىندا پەداگوگتەردىڭ ەڭبەكاقىسى 2024 -جىلعا قاراي 2 ەسە كوبەيىپ، ورتاشا العاندا 330 مىڭ تەڭگەدەن اسادى»، - دەپ جازدى باۋىرجان بايبەك Facebook-پاراقشاسىندا.

ونىڭ ايتۋىنشا، پارتيا جاستار مەن ايەلدەر كاسىپكەرلىگىن قولداۋعا ەرەكشە نازار اۋدارادى. سوندىقتان ول شىمكەنتتە كاسىپكەرلىكتى جاڭادان باستاۋشىلارعا، ەڭ الدىمەن جاستار مەن ايەلدەرگە قولداۋ كورسەتەتىن ونلاين- ورتالىق اشقان «بولاشاق» باعدارلاماسىنىڭ تۇلەكتەرىمەن كەزدەستى. بولاشاقتىقتار اتاپ كورسەتكەندەي، اگروتەحنولوگيا، ارحيتەكتۋرا، ديزاين جانە باسقا دا سالالار بويىنشا تەگىن كەڭەس بەرىلەدى.