17:08, 08 - قىركۇيەك 2021 | GMT +6
نۇر- سۇلتاندا ءيىسشىل ءيت جوعالعان 2 جاسار ءبۇلدىرشىندى تاپتى
نۇر- سۇلتان. قازاقپارات - فەليكس اتتى ءيتى بار كينولوگ مامبەتوۆ كوشەسىنىڭ بويىنداعى وقۋشىلار سارايىنىڭ ماڭايىندا 2 جاسار بالانى ىزدەپ تاپتى، دەپ حابارلايدى قازاقپارات نۇر- سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
ساعات 21:10 شاماسىندا بالالار اتتراكسيونىنىڭ جانىندا ءيتى بار پوليتسيا قىزمەتكەرىنە جاس ايەل جۇگىرىپ كەلىپ، كىشكەنتاي ۇلىن جوعالتىپ العانىن ايتقان. 20 مينۋت بويى ايەل بالانى ءوز بەتىنشە ىزدەگەن، الايدا ودان ناتيجە بولماعان. ايەلدىڭ قولىندا بالانىڭ ويىنشىعى بولدى، سونىڭ يىسىمەن فەليكس بالانىڭ ىزىنە ءتۇستى. 10 مينۋتتان كەيىن توبەت ىزدەۋ ورنىنان 300 مەتر قاشىقتىقتان بالانى تاۋىپ الدى.
بالاسىمەن قاۋىشقان انا پوليتسەيلەرگە العىس ايتتى. پوليتسيانىڭ ايتۋىنشا، 2 جاسار فەليكس قىزمەتىن جاقىندا باستاعان. بۇل - ونىڭ ءبىرىنشى ءساتتى ءىسى. ءيىسشىل توبەت جاقسى جاتتىققان، كينولوگتىڭ نۇسقاۋلارىن شيراق ورىندايدى.
اۆتور: ءبيبىحان سەرىكوۆا