الماتىدا حالىق سانى 2 ميلليونعا جەتتى
«ۇلتتىق ستاتيستيكا بيۋروسىنىڭ مالىمەتىنشە، قازىردىڭ وزىندە قازاقستاندىقتار 19 ميلليونعا جەتتى. ال الماتى حالقىنىڭ سانى ەكى ميلليوننان استى! ايالا جامبىل ەكى ميلليونىنشى تۇرعىن اتاندى. ول پوليتسيا قىزمەتكەرى بەيبىت ابىلدايەۆ پەن بالاباقشا تاربيەشىسى ءاليا جانىبەكوۆانىڭ وتباسىنداعى التىنشى قىز. دەنساۋلىق، اماندىق پەن باقىت تىلەيمىن!»، دەپ جازدى باقىتجان ساعىنتايەۆ Facebook-تەگى پاراقشاسىندا.
ەسكە سالا كەتسەك، 3-تامىزدا قازاقستان پرەزيدەنتى قاسىم-جومارت توقايەۆ ەلىمىزدە حالىق سانى 19 ميلليونعا جەتكەنىن جاريالادى.
«تاۋەلسىزدىكتىڭ 30 جىلدىعى قارساڭىندا قازاقستان حالقىنىڭ سانى تاريحي مەجەگە جەتتى. الماتى وبلىسىندا دۇنيەگە كەلگەن ءجانيا ازامات قىزى ەلىمىزدىڭ ون توعىز ميلليونىنشى ازاماتى رەتىندە تىركەلدى. ءجانيا - وتباسىندا ءتورتىنشى بالا. اتا-اناسى مەن قازاقستاندىقتاردى وسى قۋانىشپەن قۇتتىقتايمىن. باۋى بەرىك بولسىن!»، - دەپ جازدى مەملەكەت باسشىسى.