د د س ۇ باسشىسى: قازاقستاندا 2 ميلليون جۋىق ادامعا ۆاكسينا سالىنعانى - وتە جاقسى كورسەتكىش
اڭگىمە بارىسىندا COVID-19 ىندەتىنە قارسى ەكپە ەگۋ ۇدەرىسىنە باسا ءمان بەرىلدى. پرەزيدەنت دۇنيەجۇزىلىك دەنساۋلىق ساقتاۋ ۇيىمىنىڭ باسشىسىنا قازاقستاندىق QazVac ۆاكسيناسىنىڭ كلينيكالىق سىنامالارىنىڭ الدىن الا ناتيجەلەرى تۋرالى ايتتى. وتاندىق ۆاكسينانىڭ تيىمدىلىك دەڭگەيى - 96 پايىز. قازىرگى ۋاقىتتا سالالىق ورگاندار وتاندىق ۆاكسيناعا كەلىسىم الۋ ءۇشىن دۇنيەجۇزىلىك دەنساۋلىق ساقتاۋ ۇيىمىمەن جۇمىس جۇرگىزىپ جاتىر.
«بۇگىنگە دەيىن 2 ميلليون ادامعا ۆاكسينا سالىنعان ەكەن. بۇل - وتە جاقسى كورسەتكىش. كوپتەگەن ەل مۇنداي دەڭگەيگە جەتكەن جوق. حالىقتىڭ 55 پايىزىنا ەكپە سالامىز دەگەن ماقساتتارىڭىز قولداۋعا تۇرارلىق»، - دەدى دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس.
سونىمەن قاتار ول QazVac ەكپەسىنىڭ ازىرلەمەسىن قولدايتىنىن جانە دۇنيەجۇزىلىك دەنساۋلىق ساقتاۋ ۇيىمى توتەنشە جاعداي كەزىندە پايدالانۋعا بولاتىن ءدارى-دارمەكتەردىڭ تىزىمىنە قوسۋ مۇمكىندىگىن قاراستىرۋعا دايىن ەكەنىن ايتتى. ەسكە سالا كەتەيىك، بۇگىن قاسىم-جومارت توقايەۆ دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋسپەن كەزدەستى.
