باتالوۆ: الماتى وبلىسىندا تاعى 2 قانت زاۋىتى قالپىنا كەلتىرىلەدى

تالدىقورعان. قازاقپارات - الماتى وبلىسىنىڭ الاكول جانە قارابۇلاق قانت زاۋىتتارىن قايتا قالپىنا كەلتىرۋ جوسپارلانۋدا.

وڭىردەگى قىزىلشا القابىنىڭ اۋماعىن 35 مىڭ گەكتارعا ۇلعايتۋ ارقىلى قانت قىزىلشاسى كولەمىن ەكى ميلليون تونناعا دەيىن جەتكىزۋ مەجەسى بەلگىلەنگەن، - دەپ حابارلايدى قازاقپارات ءتىلشىسى.

بۇل تۋرالى بۇگىن ورتالىق كوممۋنيكاتسيالار قىزمەتىندە بريفينگ وتكىزگەن الماتى وبلىسىنىڭ اكىمى اماندىق باتالوۆ مالىمدەدى.

وبلىس باسشىسى بايانداماسىندا اگروونەركاسىپتىك كەشەندە 2022-2026 -جىلدارعا ارنالعان ۇلتتىق جوبا شەڭبەرىندە ەت، جەمىس- جيدەك، كوكونىس، قانت، ءسۇت ونىمدەرى، ءداندى جانە مايلى داقىلداردى ءوندىرۋ مەن وڭدەۋ بويىنشا جەتى ءىرى ەكوجۇيە قالىپتاستىرۋ جوسپارلانعانىن اتاپ ءوتتى.

وڭىردە 1,3 ميلليون باس ءىرى قارا، 4,5 ميلليون باس قوي- ەشكى، 1 ميلليون گەكتارعا جۋىق ەگىس القابى بار ەكەنىن ەسكەرسەك، وبلىس وسى جوبانىڭ ەڭ بەلسەندى قاتىسۋشىلارىنىڭ ءبىرى بولىپ تابىلادى.

«مىسالى، قانت وندىرەتىن ەكى زاۋىت جۇمىس ىستەپ تۇر، ەندى الاكول جانە قارابۇلاق قانت زاۋىتتارىن قالپىنا كەلتىرۋ جوسپارلانۋدا. وسىلايشا ءبىز القاپ اۋماعىن 35 مىڭ گەكتارعا ۇلعايتۋ ارقىلى قانت قىزىلشاسى كولەمىن ەكى ميلليون تونناعا دەيىن جەتكىزۋ مىندەتىن قويىپ وتىرمىز»، - دەپ اتاپ ءوتتى ا. باتالوۆ.

ءوڭىر باسشىسى ەت وڭدەيتىن «جەتىسۋ قوي» جوباسىنىڭ جۇزەگە اسىرىلا باستاعانىنا دا توقتالدى. بۇگىنگى كۇنى بارلىق ۇيىمداستىرۋ ماسەلەلەرى شەشىلگەنىن، ينجەنەرلىك ينفراقۇرىلىم قۇرىلىسىنا قارجى بولىنگەنىن، ينۆەستوردىڭ زاۋىتتى جوبالاۋدى باستاعانىن ايتتى. ەت وڭدەيتىن «جەتىسۋ قوي» جوباسى تۋرالى دا ەسكە سالىپ، وعان قاتىستى بارلىق ماسەلەلەر شەشىلگەنىن، ينجەنەرلىك ينفراقۇرىلىم قۇرىلىسىنا قارجى بولىنگەنىن جەتكىزدى.

اۆتور: سامال قابىشيەۆا